Óskemende «Ulttyq kiim» kúnine orai kóptegen is-sharalar legi ótti. Solardyń birin Oralhan Bókei atyndaǵy kitaphanadan tamashalap qaittyq. Onda ártúrli taqyrypty qamtyǵan, ulttyq qundylyqty nasihattaýǵa arnalǵan «Oiýlar sóileidi» atty festival-jármeńke ótti, – dep habarlaidy Dalanews.kz.
Festival-jármeńkede kóz qýantar dúnie kóp boldy. Ulttyq kiimder, ulttyq naqyshtaǵy ydys-aiaqtar, oiýly syrmaqtar, shapandar men taqiialar bári-bárin festival-jármeńkege qatysqan jurt qyzyǵa tamashalap, unatqanyn satyp alyp jatty.
«Oiýlar sóileidi» atty festival-jármeńke birneshe taqyryp boiynsha kópshiliktiń nazaryna usynyldy. Sharaǵa jinalǵan jurt ásirese «Ulttyq shapandar defilesin» qyzyǵa tamashalady.
– Basty maqsatymyz qazaqtyń ulttyq qundylyǵyn kópshilik qaýymǵa nasihattaý, kórsetý. Múmkindiginshe ulttyq buiymdardyń máni men mańyzyn, túp negizin túsindirý. Sondyqtan da búgingi «Oiýlar sóileidi» atty festival-jármeńkeni birneshe taqyrypqa jiktep ótkizip jatyrmyz, – deidi kitaphana qyzmetkeri Janat Máýitovna.
Festival-jármeńke «Qolóner sheberleri», «Ulttyq shapandar defilesi», «Ulttyq ydys-aiaqtar», «Syrmaqtar syry», «3D-tehnologiiada – ulttyq kiimder úlgisi» atty taqyryptar boiynsha kópshilik qaýym nazaryna usynyldy.
