وسكەمەندە «ۇلتتىق كيىم» كۇنىنە وراي كوپتەگەن ءىس-شارالار لەگى ءوتتى. سولاردىڭ ءبىرىن ورالحان بوكەي اتىنداعى كىتاپحانادان تاماشالاپ قايتتىق. وندا ءارتۇرلى تاقىرىپتى قامتىعان، ۇلتتىق قۇندىلىقتى ناسيحاتتاۋعا ارنالعان «ويۋلار سويلەيدى» اتتى فەستيۆال-جارمەڭكە ءوتتى، – دەپ حابارلايدى Dalanews.kz.
فەستيۆال-جارمەڭكەدە كوز قۋانتار دۇنيە كوپ بولدى. ۇلتتىق كيىمدەر، ۇلتتىق ناقىشتاعى ىدىس-اياقتار، ويۋلى سىرماقتار، شاپاندار مەن تاقيالار ءبارى-بارىن فەستيۆال-جارمەڭكەگە قاتىسقان جۇرت قىزىعا تاماشالاپ، ۇناتقانىن ساتىپ الىپ جاتتى.
«ويۋلار سويلەيدى» اتتى فەستيۆال-جارمەڭكە بىرنەشە تاقىرىپ بويىنشا كوپشىلىكتىڭ نازارىنا ۇسىنىلدى. شاراعا جينالعان جۇرت اسىرەسە «ۇلتتىق شاپاندار دەفيلەسىن» قىزىعا تاماشالادى.
– باستى ماقساتىمىز قازاقتىڭ ۇلتتىق قۇندىلىعىن كوپشىلىك قاۋىمعا ناسيحاتتاۋ، كورسەتۋ. مۇمكىندىگىنشە ۇلتتىق بۇيىمداردىڭ ءمانى مەن ماڭىزىن، ءتۇپ نەگىزىن ءتۇسىندىرۋ. سوندىقتان دا بۇگىنگى «ويۋلار سويلەيدى» اتتى فەستيۆال-جارمەڭكەنى بىرنەشە تاقىرىپقا جىكتەپ وتكىزىپ جاتىرمىز، – دەيدى كىتاپحانا قىزمەتكەرى جانات ءماۋىتوۆنا.
فەستيۆال-جارمەڭكە «قولونەر شەبەرلەرى»، «ۇلتتىق شاپاندار دەفيلەسى»، «ۇلتتىق ىدىس-اياقتار»، «سىرماقتار سىرى»، «3D-تەحنولوگيادا – ۇلتتىق كيىمدەر ۇلگىسى» اتتى تاقىرىپتار بويىنشا كوپشىلىك قاۋىم نازارىنا ۇسىنىلدى.
