Qazaqstanda pedofilderge qatysty baqylaý sharalary kúsheitilmek. Bul jóninde Ishki ister ministriniń orynbasary Igor Lepeha málimdedi, dep habarlaidy Dalanews.kz.
Endi mundai qylmyskerlerge qatysty ákimshilik baqylaý merzimsiz engizilýi múmkin. Qazirgi zańnamaǵa sáikes, sottalǵan pedofil túrmeden bosatylǵannan keiin segiz jyl boiy – iaǵni sottylyǵy ótelgenge deiingi aralyqta – ákimshilik qadaǵalaýda bolady. Alaida IIM bul baqylaý merzimin sheksiz uzartýǵa nietti.
Lepehanyń aitýynsha, eger quqyq qorǵaý organdary atalǵan tulǵadan qaitalanatyn qylmys qaýpin baiqasa, olar jarty jyl saiyn sotqa júginip, baqylaýdy uzartýdy surai alady.
"Qazirgi tańda bul baqylaý merzimin shekteýsiz uzartýǵa múmkindik bar", – dedi ol.
Sot mundai ótinishterdi qarap, eger adamnan qaita qylmys jasaý qaýpi baiqalsa, baqylaý sharalaryn jalǵastyrý týraly sheshim shyǵara alady.
Ministr orynbasarynyń aitýynsha, bolashaqta pedofilder ómir boiy baqylaýda bolýy tiis.
Sonymen qatar sot ákimshilik baqylaý aiasynda belgili bir aýmaqtarǵa – mektepter men balalar mekemeleriniń mańyna – barýǵa tyiym salýy múmkin. Bul shekteýlerdi buzǵan jaǵdaida, azamat ákimshilik nemese qylmystyq jaýapkershilikke tartylady. Sondai-aq túngi ýaqytta úiden tys júrýge de shekteý qoiylýy múmkin.
Jańa sharalardyń biri – resmi eskertý engizý.
"Biz oǵan resmi túrde eskertý jasaimyz: Mundai áreketke jol berilmeidi. Siz ózińizdi qoǵamǵa laiyq túrde ustaýyńyz kerek", – dep túsindirdi Lepeha.
Eger azamat qoǵamdyq tártipti júieli túrde buzsa, kórshilerine tynyshtyq bermese nemese basqa da antiáleýmettik minez-qulyq tanytsa, ýchaskelik inspektor oǵan resmi eskertý jasai alady.
Aita keteiik, Qazaqstanda 2016 jyldan beri balalarǵa qatysty jynystyq qylmys jasaǵan adamdar týraly ashyq derekter bazasy jumys isteidi. 2023 jyly mundai tizimge 338 adam tirkelse, 2024 jyldyń ózinde 406 adam esepke alynǵan.
