Buryn Lepsi atanǵan kóshege Fýrmanov aty 1956 jyly berilgen. Almatydaǵy eń ortalyq kóshe bolǵandyqtan bul kóshe táýelsizdik jyldarynda jalpy Azattyq dańǵyly atalýǵa ábden laiyq edi.
2019 jyly halyqpen, turǵyndarmen tártip boiynsha kelisilmesten bul kóshege birden eks-prezidenttiń aty berilip ketti. Endi bul qatelikti, asyǵys aǵattyqty jóndeitin shaq týdy!
Elimizde táýelsizdik alǵannan keiingi 32 jylda jasalýǵa tiisti otarsyzdandyrý (dekolonizatsiia), sovetsizdendirý (desovetizatsiia) úderisterimen qatar dál búgingi tańda qolǵa alynatyn sharýa – nursyzdandyrý (denurizatsiia). Ókinishke qarai bilik transformatsiiasynyń tolqyny kemerinen asyp óte almai Nazarbaev rejiminiń sheńberinde qalyp qoidy. Biraq bári bir ketken qatelikter túzetilýge tiis!
Eks-elbasy óziniń atyn shyǵarýǵa asa qumar bolǵanyn bilemiz. Elordanyń da aty eki-úsh jyldai Nur-Sultan boldy. Onyń aty berilgen mekemeler qatarynda prezident arhivi men kitaphanasy bar. Odan bólek, elordada tuńǵysh prezident murajaiy men Nazarbaev ýniversiteti bar. Nazarbaevtyń ziiatkerlik mektepteri ár oblys ortalyǵynda bar.
Munyń bári memleket biýdjeti esebinen qarjylandyrylady. Qaladaǵy temir jol vokzaly men halyqaralyq áýejai da Nazarbaevtyń atynda.
Jeke basqa tabyný jyldarynda Almatyda dendropark, basqa oblys ortalyqtarynda saiabaqtar ashyldy. Shyǵarylǵan poshta markileri men qyzǵaldaq sorttaryn aitpai-aq qoialyq.
2019 jyly bilik tranformatsiiasy kezinde Qazaqstandaǵy barlyq oblys ortalyqtarynyń basty kósheleriniń aty Nazarbaev kóshesi dep ózgertildi. Tipti, onyń aty-jóni Qazaqstan Ánurany avtorlarynyń biri retinde kórsetilgen.
Jaǵympazdar qoldaýymen Nazarbaevtyń atyn máńgi este qaldyrý úshin ne istelmedi deseńizshi?! 1998 jyly Ile Alataýynyń Komsomol shyńy ataýy «Nursultan shyńy» dep ózgertildi.
Qazaqstannyń Syrtqy ister vedomstvosynyń aralasýymen Túrkiia astanasy Ankarada, Sheshenstan astanasy Groznyida, Úrdin eliniń (Iordaniia) astanasy Ammanda, Qyrǵyzstannyń Sholpan Ata qalasynda kóshelerge Nursultan Nazarbaev aty berilip, tipti qola músinderi, eskertkishteri ornatyldy.
Nursultan Nazarbaevtyń qurmetine «Qazaqstan Respýblikasynyń Tuńǵysh Prezidenti – Elbasy Nursultan Nazarbaev» ordeni taǵaiyndalǵany bar.
Mektep deisiz be, institýt deisiz be, park deisiz be osylai tolyp jatyr. Táttini jei berse adamnyń qusqysy keletin siiaqty bul ataý da adamdardyń júregin loqsytyp, narazylyǵyn arttyryp, ashýyn keltirip júrgenine talai jyl boldy.
Endi bes jyldan keiin bolsa da, on jyldan keiin bolsa da bul ataýdyń múlde joiylatynyna, halyqtyń jadynan óshetinine esh kúmán joq. Halyqqa jasaǵan jaqsylyǵy «eki siyrdan» aspaǵan eks-prezidentti sonshalyqty ardaqtaý esh qisynǵa kelmeidi.
Istegen azdy-kópti paidaly qyzmeti bolsa ol úshin eń úlken jalaqy alǵany da belgili. Ol jalaqysy shekteýli mólsherde bolsa ony qupiialap ustamas edi. Sondai-aq, onyń jáne otbasynyń qyzmet babyn, týystyq jaqyndyǵyn paidalanyp jekeshelendirip alǵan eldegi, shet elderdegi nysandaryn, orasan zor aktivterin biýdjetke qaitarý kún tártibinen túspeýi kerek!
Búgingi bilik tutqasyna korýptsiiadan alys, jaǵympazdyqtan joǵary jas tolqyn kelip jatyr. «Ádiletti Qazaqstan» urany halyq arasynda senim týǵyzý úshin ádiletsizdikterge jol bergen diktator Nazarbaevtyń ózi de, biligi de qoǵamdyq turǵydan da, zańdyq turǵydan da aiyptalýǵa tiis!
Marat Baidildauly
