AD halyqaralyq basylymy (Architectural Digest) 2025 jyly ashylatyn iri mýzeiler tizimin jariialady. Tizimge Parijdegi Cartier qorynan bastap Naosimadaǵy jańa óner murajaiyna deiingi álemniń túkpir-túkpirindegi túrli mádeni nysandar kirgen. Sonyń ishinde 2025 jyldyń jańalyǵy bola alatyn AQSh, BAÁ, Japoniia, Frantsiia, Niderlandyda ornalasqan 11 murajaidyń aty erekshe atalyp kórsetiledi. Atalǵan tizimde Nurlan Smaǵulovtyń Almaty Museum of Arts jeke zamanaýi óner murajaiy da júr, dep jazady Dalanews.kz.
Forbes.kz basylymynyń málimetinshe, Nurlan Smaǵulovqa tiesili ǵimarattyń jobasyn 60 eldegi sáýlet nysandarynyń avtory, britandyq Chapman Taylor sáýlet biýrosy jasaǵan.
"Quddy bári aldyn ala kelisip alǵandai, álemniń jetekshi sáýletshileri tamasha ǵimarattardyń jobasyn jasady: sáýletshi 10 jyldan astam ýaqytyn ketirgen Ábý-Dabidegi kópten kútken Gýggenhaim Frenk Geri murajaiy; Parijdegi Jan Nývel syzbasyn jasaǵan Cartier qory; Rotterdamdaǵy MAD Architects kompaniiasynyń fýtýristik Fenix-i (Los-Andjelestegi Lýkas murajaiy da osy stýdiia jasaǵan); Ábý-Dabidegi Foster + Partners kompaniiasynyń sheih Zaidtyń ulttyq murajaiy; Tadao Ando jasaǵan Naosimadaǵy jańa óner murajaiy kózdi tundyrady", - dep jazady AD.
Forbes Kazakhstan málimetinshe, Smaǵulovtyń jobasyna jasalǵan investitsiialardyń jalpy somasy 100 mln dollardan asady. Oǵan murajai ǵimaratynyń qurylysy, óner týyndylaryn satyp alý jáne murajai shyǵyndaryn jabý úshin endaýment-qoryn qurýǵa jumsalǵan shyǵyndar kiredi.
Almaty Museum of Arts toptamasyn, negizinen qazaqstandyq sýretshiler qamtidy: Aisha Ǵalymbaeva, Salihitdin Aitbaev, Ábdirashit Sydyhanov, Rýstam Halfin, Erbosyn Meldibekov jáne taǵy basqalary. Sondai-aq murajaida Richard Serra, Anselm Kifer, Bill Viola, Aleksandr Kalder syndy sheteldik sýretshilerdiń jumystary usynylady. Bárinen buryn, sheteldikterdi mundaǵy aty ańyzǵa ainalǵan japon sýretshisi Iaioi Kýsamanyń "Sheksizdik bólmeleri" atty immersivti installiatsiiasy qatty qyzyqtyryp otyrǵan kórinedi.
Buǵan deiin saitymyzda Nurlan Smaǵulovtyń kompaniiasy KASE-degi jai aktsiialaryn keri qaitaryp alǵanyn jazǵanbyz.
