AD حالىقارالىق باسىلىمى (Architectural Digest) 2025 جىلى اشىلاتىن ءىرى مۋزەيلەر ءتىزىمىن جاريالادى. تىزىمگە پاريجدەگى Cartier قورىنان باستاپ ناوسيماداعى جاڭا ونەر مۇراجايىنا دەيىنگى الەمنىڭ تۇكپىر-تۇكپىرىندەگى ءتۇرلى مادەني نىساندار كىرگەن. سونىڭ ىشىندە 2025 جىلدىڭ جاڭالىعى بولا الاتىن اقش، ءباا، جاپونيا، فرانسيا، نيدەرلاندىدا ورنالاسقان 11 مۇراجايدىڭ اتى ەرەكشە اتالىپ كورسەتىلەدى. اتالعان تىزىمدە نۇرلان سماعۇلوۆتىڭ Almaty Museum of Arts جەكە زاماناۋي ونەر مۇراجايى دا ءجۇر، دەپ جازادى Dalanews.kz.

Forbes.kz باسىلىمىنىڭ مالىمەتىنشە، نۇرلان سماعۇلوۆقا تيەسىلى عيماراتتىڭ جوباسىن 60 ەلدەگى ساۋلەت نىساندارىنىڭ اۆتورى، بريتاندىق Chapman Taylor ساۋلەت بيۋروسى جاساعان.

"قۇددى ءبارى الدىن الا كەلىسىپ العانداي، الەمنىڭ جەتەكشى ساۋلەتشىلەرى تاماشا عيماراتتاردىڭ جوباسىن جاسادى: ساۋلەتشى 10 جىلدان استام ۋاقىتىن كەتىرگەن ابۋ-دابيدەگى كوپتەن كۇتكەن گۋگگەنحايم فرەنك گەري مۇراجايى؛ پاريجدەگى جان نۋۆەل سىزباسىن جاساعان Cartier قورى؛ روتتەردامداعى MAD Architects كومپانياسىنىڭ فۋتۋريستىك Fenixء-ى (لوس-اندجەلەستەگى لۋكاس مۇراجايى دا وسى ستۋديا جاساعان)؛ ابۋ-دابيدەگى Foster + Partners كومپانياسىنىڭ شەيح زايدتىڭ ۇلتتىق مۇراجايى؛ تاداو اندو جاساعان ناوسيماداعى جاڭا ونەر مۇراجايى كوزدى تۇندىرادى"، - دەپ جازادى AD.

Forbes Kazakhstan مالىمەتىنشە، سماعۇلوۆتىڭ جوباسىنا جاسالعان ينۆەستيسيالاردىڭ جالپى سوماسى 100 ملن دوللاردان اسادى. وعان مۇراجاي عيماراتىنىڭ قۇرىلىسى، ونەر تۋىندىلارىن ساتىپ الۋ جانە مۇراجاي شىعىندارىن جابۋ ءۇشىن ەنداۋمەنت-قورىن قۇرۋعا جۇمسالعان شىعىندار كىرەدى. 

Almaty Museum of Arts توپتاماسىن، نەگىزىنەن قازاقستاندىق سۋرەتشىلەر قامتيدى: ايشا عالىمبايەۆا، ساليحيتدين ايتبايەۆ، ءابدىراشيت سىدىحانوۆ، رۋستام حالفين، ەربوسىن مەلدىبەكوۆ جانە تاعى باسقالارى.  سونداي-اق مۇراجايدا ريچارد سەررا، انسەلم كيفەر، بيلل ۆيولا، الەكساندر كالدەر سىندى شەتەلدىك سۋرەتشىلەردىڭ جۇمىستارى ۇسىنىلادى. بارىنەن بۇرىن، شەتەلدىكتەردى مۇنداعى اتى اڭىزعا اينالعان جاپون سۋرەتشىسى يايوي كۋسامانىڭ "شەكسىزدىك بولمەلەرى" اتتى يممەرسيۆتى ينستاللياسياسى قاتتى قىزىقتىرىپ وتىرعان كورىنەدى.

بۇعان دەيىن سايتىمىزدا نۇرلان سماعۇلوۆتىڭ كومپانياسى KASE-دەگى جاي اكسيالارىن كەرى قايتارىپ العانىن جازعانبىز.