Qazaqstannyń burynǵy prezidenti Nursultan Nazarbaevtyń jieni Nurbol Nazarbaev ózin bankrot dep taný jóninde sotqa ótinish bergen. Alaida sot arqyly resmi túrde bankrot ataný oǵan ázirge múmkin bolmai otyr, dep habarlaidy Dalanews.kz Tengrinews.kz saityna silteme jasap.
Biyl qyrkúiek aiynda Nurbol Nazarbaev sotqa jeke tulǵany bankrot dep taný týraly aryz joldaǵan. Ótinish qabyldanyp, «sottyq bankrottyq protsedýrasyn qoldaný týraly» azamattyq is qozǵaldy.
Odan keiin qazan aiynda Shishkin Like Telegram-arnasy Nurbol Nazarbaevtyń 15 qyrkúiekten bastap boryshker retinde tirkelgenin habarlaǵan edi. Bereshek somasy – 57 milliard teńge. Sol kezde onyń barlyq bank shottary buǵattalyp, múlkine tyiym salynǵany, sondai-aq kompaniialardaǵy úlesterine shekteý qoiylǵany aityldy. Buǵan qosa, oǵan elden shyǵýǵa tyiym salynǵan.
Sottyń baspasóz qyzmeti Nazarbaevtyń ótinishi qaraýsyz qalǵanyn habarlady.
«2025 jylǵy 19 qarashadaǵy anyqtamaǵa sáikes, Nazarbaev Nurbol Bolatulynyń tólem qabilettiligin qalpyna keltirý protsedýrasyn qoldaný týraly aryzy qaraýsyz qaldyryldy», – delingen joldanǵan jaýapta.
Osylaisha, eks-prezidenttiń jieni ázirge resmi túrde bankrot bolyp, tólem qabilettiligin qalpyna keltirýge qol jetkize almady.
Aita keteiik, bankrottyq – qaryzyn ótei almai qalǵan jeke tulǵa nemese kompaniianyń zańdy túrde boryshtan qutylý tetigi. Sot arqyly bankrottyq rásimi júrgizilgen jaǵdaida, boryshkerdiń múlki satylyp, túsken qarajat qaryzdy óteýge jumsalady. Múlik jetpegen jaǵdaida qalǵan qaryzdar zańǵa sai keshirilýi múmkin.
