قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ جيەنى نۇربول نازاربايەۆ ءوزىن بانكروت دەپ تانۋ جونىندە سوتقا ءوتىنىش بەرگەن. الايدا سوت ارقىلى رەسمي تۇردە بانكروت اتانۋ وعان ازىرگە مۇمكىن بولماي وتىر، دەپ حابارلايدى Dalanews.kz Tengrinews.kz سايتىنا سىلتەمە جاساپ.

بيىل قىركۇيەك ايىندا نۇربول نازاربايەۆ سوتقا جەكە تۇلعانى بانكروت دەپ تانۋ تۋرالى ارىز جولداعان. ءوتىنىش قابىلدانىپ، «سوتتىق بانكروتتىق پروسەدۋراسىن قولدانۋ تۋرالى» ازاماتتىق ءىس قوزعالدى.

ودان كەيىن قازان ايىندا Shishkin Like Telegram-ارناسى نۇربول نازاربايەۆتىڭ 15 قىركۇيەكتەن باستاپ بورىشكەر رەتىندە تىركەلگەنىن حابارلاعان ەدى. بەرەشەك سوماسى – 57 ميلليارد تەڭگە. سول كەزدە ونىڭ بارلىق بانك شوتتارى بۇعاتتالىپ، مۇلكىنە تىيىم سالىنعانى، سونداي-اق كومپانيالارداعى ۇلەستەرىنە شەكتەۋ قويىلعانى ايتىلدى. بۇعان قوسا، وعان ەلدەن شىعۋعا تىيىم سالىنعان.

سوتتىڭ باسپا ءسوز قىزمەتى نازاربايەۆتىڭ ءوتىنىشى قاراۋسىز قالعانىن حابارلادى.

«2025 جىلعى 19 قاراشاداعى انىقتاماعا سايكەس، نازاربايەۆ نۇربول بولات ۇلىنىڭ تولەم قابىلەتتىلىگىن قالپىنا كەلتىرۋ پروسەدۋراسىن قولدانۋ تۋرالى ارىزى قاراۋسىز قالدىرىلدى»، – دەلىنگەن جولدانعان جاۋاپتا.

وسىلايشا، ەكس-پرەزيدەنتتىڭ جيەنى ازىرگە رەسمي تۇردە بانكروت بولىپ، تولەم قابىلەتتىلىگىن قالپىنا كەلتىرۋگە قول جەتكىزە المادى.

ايتا كەتەيىك، بانكروتتىق – قارىزىن وتەي الماي قالعان جەكە تۇلعا نەمەسە كومپانيانىڭ زاڭدى تۇردە بورىشتان قۇتىلۋ تەتىگى. سوت ارقىلى بانكروتتىق ءراسىمى جۇرگىزىلگەن جاعدايدا، بورىشكەردىڭ مۇلكى ساتىلىپ، تۇسكەن قاراجات قارىزدى وتەۋگە جۇمسالادى. مۇلىك جەتپەگەن جاعدايدا قالعان قارىزدار زاڭعا ساي كەشىرىلۋى مۇمكىن.