Qaraǵandyda kásipker Erlan Nyǵmatýlinge tiesili “YDD Corporation” ferroqorytpa zaýytynda jumysshylardyń qaza bolýyna bailanysty qylmystyq istiń qozǵalǵanyna jarty jyldan astam ýaqyt ótti. Alaida kúdiktiler áli anyqtalmaǵan, dep habarlaidy Dalanews.kz.
“Qajetti saraptamalar taǵaiyndaldy, biraq tolyq aiaqtalǵan joq. Saraptama nátijelerin kútip otyrmyz”, – dep málimdedi Qaraǵandy oblysy politsiia departamentiniń baspasóz qyzmeti KazTAG redaktsiiasyna.
Sondai-aq quqyq qorǵaý organdary atalǵan istiń “Eńbekti qorǵaý erejelerin buzý, abaisyzda eki nemese odan da kóp adamnyń ólimine ákelý” baby boiynsha tek oqiǵa faktisi negizinde tergelip jatqanyn, ázirge naqty kúdiktilerdiń joq ekenin atap ótti.
Zaýyttaǵy tragediia jáne tergeý barysy
Eske sala keteiik, 2024 jyly 20 shildede “YDD Corporation” ferroqorytpa zaýytynda tótenshe jaǵdai oryn aldy. Kompaniia bul oqiǵany “kútpegen jaǵdai” dep atady. №1 balqytý peshinde kenetten jalyn atqylap, saldarynan segiz qyzmetker aýyr jaraqat aldy. Atalǵan oqiǵa boiynsha qylmystyq is qozǵaldy.
Intsidentti tergeý úshin respýblikalyq arnaiy komissiia quryldy. Sarapshylardyń qorytyndysy boiynsha, jumys berýshiniń basty jaýapkershiligi aiqyndalǵan. Memlekettik organdardyń málimetinshe, kásiporynda eńbek qaýipsizdigin qamtamasyz etýge baǵyttalǵan shuǵyl sharalar tiisti deńgeide oryndalmaǵan, jumysshylardyń densaýlyǵyna ziian tigizetin faktorlardy azaitýǵa qajetti jaǵdailar jasalmaǵan. Alaida peshtiń tutaný sebebi áli naqty anyqtalǵan joq.
“YDD Corporation” kompaniiasy arnaiy komissiianyń tergeý nátijelerine qatysty eshqandai pikir bildirgen joq.
Oqiǵa saldarynan plavildi tsehtyń mehanigi Dmitro Adamchýk, bas mehanik qyzmetiniń sheberi Tólegen Jetpisbaev, tehnolog Erulan Qazken jáne pesh bastyǵy Muzafar Ismaiylov qaza tapty.
Zaýyttaǵy qaiǵyly oqiǵalar tizbegi
Bul – “YDD Corporation” zaýytynda oryn alǵan alǵashqy tótenshe jaǵdai emes. 2022 jylǵy mamyrda dál osy kásiporynda rýdoplavildi peshten jalyn atqylap, jumysshy Suńǵat Tontaev aýyr kúiik aldy. Ol 80% eńbek qabiletinen aiyrylyp, ekinshi toptaǵy múgedek atandy.
Alaida, atalǵan oqiǵa boiynsha “Eńbekti qorǵaý erejelerin buzý, abaisyzda aýyr jaraqatqa ákelý” baby boiynsha qozǵalǵan qylmystyq is bir jyl ótken soń merzimniń ótýine bailanysty toqtatylǵan.
Parallel túrde jábirlenýshi sotqa júginip, kompaniiany ózine múgedektik ákelgen jaǵdaiǵa tikelei jaýapty dep tanýdy talap etken. Ol kezde oqiǵa qoǵamǵa keńinen jariia boldy.
Kompaniia jáne onyń quryltaishylary
"YDD Corporation" – joǵary sapaly ferrosilitsii, tsement jáne mikrokremnezemdi beton óndirisimen ainalysatyn kásiporyn. Onyń teń ieleriniń biri – kásipker Erlan Nyǵmatýlin, ol Qazaqstannyń burynǵy Májilis tóraǵasy Nurlan Nyǵmatýlinniń egizi.
Kásiporynnyń basqa quryltaishylary qatarynda Forbes Kazakhstan tizimindegi biznesmen Dinmuhamed Ydyrysovtyń uly Jarmahanbet Appaz, sondai-aq kásipker David Kemertelidze bar.
KazTAG agenttiginiń málimetinshe, zaýyttyń qunynyń 66%-y memleket qarajaty esebinen qarjylandyrylǵan.
Úkimettiń reaktsiiasy jáne Nyǵmatýlinderge qatysty aiyptaýlar
2024 jylǵy 25 shildede QR Premer-Ministri Oljas Bektenov atalǵan qaiǵyly oqiǵanyń tergeýin jeke baqylaýyna alǵanyn málimdedi.
Al 30 shildede belgili bolǵandai, zaýyt basshylyǵy apat oryn alǵan sátten bastap eki saǵat boiy tótenshe jaǵdai qyzmetine habar bermegen jáne qutqarýshylardy obektige kirgizýden bas tartqan.
Nurlan Nyǵmatýlin 2022 jyly 1 aqpanda, Qańtar oqiǵasynan keiin, Májilis tóraǵasy qyzmetinen ketken bolatyn. Ol bul laýazymdy 2016 jyldan beri atqaryp kelgen, sondai-aq 2012-2014 jyldary da spiker bolǵan. Buǵan deiin ol Prezident Ákimshiligin basqarǵan, sondai-aq Qaraǵandy oblysynyń ákimi qyzmetin atqarǵan.
Erlan Nyǵmatýlin Májilis pen Senattyń burynǵy depýtaty, al olardyń úlken aǵasy Arǵyn Nyǵmatýlin – Qaraǵandy oblystyq máslihatynyń burynǵy depýtaty.
Baýyrlaryna reiderlik áreketterge qatysy bar, qylmystyq qurylymdarmen bailanysy bar, zańsyz qylmystyq ister uiymdastyrǵan degen aiyptar birneshe ret taǵylǵan. Alaida olardyń eshqaisysy jaýapkershilikke tartylǵan joq.
