Qazaqstandaǵy «Alataý» sanatoriiin satý mámilesinen Nazarbaev áýletimen bailanysy bar qor shamamen 50 mln dollar paida kórgeni habarlandy. Mamandardyń aitýynsha, bul soma jyljymaityn múliktiń naqty qunynan edáýir tómen: gollandiialyq Noord Holland Trading Company B.V. esebinde nysannyń baǵasy 174 mln dollar dep kórsetilgen. Biraq kompaniia sanatoriidi shamamen úsh ese arzanǵa satyp aldy, dep habarlaidy Dalanews.kz "Vyhod k moriý" telegram arnasyna silteme jasap.
«Alataý» kesheni 1986 jyly keńestik sheneýnikter úshin salynǵan. 90-jyldardyń ortasynda memlekettik HOZÝ korporatsiiasynyń qolyna ótkenimen, ony Nazarbaevtyń senimdi serigi sanalatyn marqum Vladimir Ni basqardy. Keiin jekeshelendirý kezinde aktivter arzanǵa satylyp, satyp alýshylar qatarynda eldiń eks-prezidentine jaqyn tulǵalar bolǵan.
2017 jylǵa deiin «Alataýdyń» aktsiialary milliarder Vladimir Kim men sanatorii direktory Orazgeldi Túktibaevqa tiesili ofshorlyq Karnell Holding kompaniiasynyń ieliginde edi. Túktibaev óz úlesin «Elbasy Qorynyń» jeke qurylymyna ótkizgen soń, ǵimarat qaita jańartylyp, Swissôtel jelisiniń basqarýyna berildi. Jylyna shamamen 11 mln dollar jalǵa alý aqysy tólenip kelgeni belgili boldy.
2022 jyldyń qańtar oqiǵalarynan keiin Nazarbaev birqatar aktivinen airylǵany týraly aqparat shyqty. Almatydaǵy «Rýblevka» dep atalatyn aimaqtaǵy rezidentsiia memlekettiń «Astana-20» qorynyń ieligine ótti. Sol mańdaǵy 13 gektar jer ýchaskeleri, qonaqúiler men balalar lagerleri siiaqty múlik Noord Holland-qa jazylyp, nátijesinde gollandiialyq kompaniia sanatoriidi úsh esege jýyq arzan baǵaǵa aldy.
Noord Holland-tyń qarjy esebinde kompaniianyń túpki iesi retinde Lihtenshteindegi Woodbridge Foundation atalady, alaida mundai uiymdy ol eldiń tiziliminen tabý múmkin bolmaǵan. Bailanys dereginde Trevisa Treuhand Anstalt zań firmasy kórsetilip, ony Lihtenshtein zańgeri Klemens Laternzer basqarady. Ol Noord Holland-tyń «jalǵyz benefitsiary» dep tirkelgen.
Noord Holland direktory bolyp Niderland pen Resei azamatshasy Anna Berezina taǵaiyndalǵan. Ol buryn Vladimir Kim men Edýard Ogaiǵa tiesili birneshe iri aktivti óz atyna rásimdegen. Sarapshylardyń paiymdaýynsha, bul qurylymdar qupiia men menshikke halyqaralyq sottarda meilinshe qorǵanys qamtamasyz etý úshin jasalǵan. Nazarbaevqa jaqyn adamdar osylaisha kúrdeli korporativtik shemalar arqyly aktivterdi qaýipsiz aimaqqa shyǵardy degen boljam bar.
