قازاقستانداعى «الاتاۋ» ءساناتورييىن ساتۋ مامىلەسىنەن نازاربايەۆ اۋلەتىمەن بايلانىسى بار قور شامامەن 50 ملن دوللار پايدا كورگەنى حابارلاندى. مامانداردىڭ ايتۋىنشا، بۇل سوما جىلجىمايتىن مۇلىكتىڭ ناقتى قۇنىنان ەداۋىر تومەن: گوللانديالىق Noord Holland Trading Company B.V. ەسەبىندە نىساننىڭ باعاسى 174 ملن دوللار دەپ كورسەتىلگەن. ءبىراق كومپانيا ءساناتورييدى شامامەن ءۇش ەسە ارزانعا ساتىپ الدى، دەپ حابارلايدى Dalanews.kz "ۆىحود ك موريۋ" تەلەگرام ارناسىنا سىلتەمە جاساپ.
«الاتاۋ» كەشەنى 1986 جىلى كەڭەستىك شەنەۋنىكتەر ءۇشىن سالىنعان. 90-جىلداردىڭ ورتاسىندا مەملەكەتتىك حوزۋ كورپوراسياسىنىڭ قولىنا وتكەنىمەن، ونى نازاربايەۆتىڭ سەنىمدى سەرىگى سانالاتىن مارقۇم ۆلاديمير ني باسقاردى. كەيىن جەكەشەلەندىرۋ كەزىندە اكتيۆتەر ارزانعا ساتىلىپ، ساتىپ الۋشىلار قاتارىندا ەلدىڭ ەكس-پرەزيدەنتىنە جاقىن تۇلعالار بولعان.
2017 جىلعا دەيىن «الاتاۋدىڭ» اكسيالارى ميللياردەر ۆلاديمير كيم مەن ساناتوريي ديرەكتورى ورازگەلدى تۇكتىبايەۆقا تيەسىلى وفشورلىق Karnell Holding كومپانياسىنىڭ يەلىگىندە ەدى. تۇكتىبايەۆ ءوز ۇلەسىن «ەلباسى قورىنىڭ» جەكە قۇرىلىمىنا وتكىزگەن سوڭ، عيمارات قايتا جاڭارتىلىپ، Swissôtel جەلىسىنىڭ باسقارۋىنا بەرىلدى. جىلىنا شامامەن 11 ملن دوللار جالعا الۋ اقىسى تولەنىپ كەلگەنى بەلگىلى بولدى.
2022 جىلدىڭ قاڭتار وقيعالارىنان كەيىن نازاربايەۆ ءبىرقاتار اكتيۆىنەن ايرىلعانى تۋرالى اقپارات شىقتى. الماتىداعى «رۋبليەۆكا» دەپ اتالاتىن ايماقتاعى رەزيدەنسيا مەملەكەتتىڭ «استانا-20» قورىنىڭ يەلىگىنە ءوتتى. سول ماڭداعى 13 گەكتار جەر ۋچاسكەلەرى، قوناقۇيلەر مەن بالالار لاگەرلەرى سياقتى مۇلىك Noord Holland-قا جازىلىپ، ناتيجەسىندە گوللانديالىق كومپانيا ءساناتورييدى ءۇش ەسەگە جۋىق ارزان باعاعا الدى.
Noord Holland-تىڭ قارجى ەسەبىندە كومپانيانىڭ تۇپكى يەسى رەتىندە ليحتەنشتەيندەگى Woodbridge Foundation اتالادى، الايدا مۇنداي ۇيىمدى ول ەلدىڭ تىزىلىمىنەن تابۋ مۇمكىن بولماعان. بايلانىس دەرەگىندە Trevisa Treuhand Anstalt زاڭ فيرماسى كورسەتىلىپ، ونى ليحتەنشتەين زاڭگەرى كلەمەنس لاتەرنزەر باسقارادى. ول Noord Holland-تىڭ «جالعىز بەنەفيسيارى» دەپ تىركەلگەن.
Noord Holland ديرەكتورى بولىپ نيدەرلاند پەن رەسەي ازاماتشاسى اننا بەرەزينا تاعايىندالعان. ول بۇرىن ۆلاديمير كيم مەن ەدۋارد وگايعا تيەسىلى بىرنەشە ءىرى اكتيۆتى ءوز اتىنا راسىمدەگەن. ساراپشىلاردىڭ پايىمداۋىنشا، بۇل قۇرىلىمدار قۇپيا مەن مەنشىككە حالىقارالىق سوتتاردا مەيلىنشە قورعانىس قامتاماسىز ەتۋ ءۇشىن جاسالعان. نازاربايەۆقا جاقىن ادامدار وسىلايشا كۇردەلى كورپوراتيۆتىك سحەمالار ارقىلى اكتيۆتەردى ءقاۋىپسىز ايماققا شىعاردى دەگەن بولجام بار.
