Belgili dáriger, kezinde Dinmuhamed Qonaev, Asanbai Asqarov sekildi qairatkerlerdiń qasynda júrgen Músilim Daiyrbekov Ashyq podcast YouTube-arnasyna bergen suhbatynda 12 jyl nege túrmede otyrǵanyn aitty, - dep habarlaidy Dalanews.kz.
Memlekettik qaýipsizdik komiteti Músilim Daiyrbekovtiń artyna túsken. Onyń sózinshe, taqqan aiyptary Asqarovpen aradaǵy bailanys bolǵan.
"Asqarovtyń úiinde bolady, Asqarovtyń aǵaiyny, sonyń adamy, sony ustasaq, biraz aiybyn ashady" degen bolýy kerek. Asanbai Asqarov týraly kóp suraqtar berdi, qinady. Men negizinde ol týraly eshteńe bilmeimin. Bilsem de aitpas edim. Olar birdeńe tabamyz dedi. Men 5 jarym jyl otyrdym. Keiin olar (isti - esk.) qaita qarady. Joǵary sot otyrǵyzatyndai eshteńe jasamaǵanymdy kórdi. Odan keiin ózderi sottaýǵa uialdy. Keiin Qyrǵyzstanǵa berip jiberdi. Meniń isimdi tatar áiel qarady. Kóp jyl otyrǵyzǵannan keiin ózderine sóz kelmes úshin qyrǵyzǵa bere salady. Qyrǵyzdar tekserdi, meni taza qylyp shyǵardy. Bes-alty ordenim bar edi, bárin qaitaryp berdi, istegen qyzmetime qaitaryp ákep qoidy. Qaita bas dáriger boldym", - dep áńgimeledi ol.
Asanbai Asqarov kórnekti memleket, saiasat jáne qoǵam qairatkeri bolǵan. Óz zamanynda Almaty, Jambyl jáne Shymkent oblystary partiia komitetteriniń birinshi hatshysy qyzmetterin atqarǵan.
Músilim Daiyrbekovtiń isine 16 tergeýshi tartylǵan eken, tipti jeteýi Máskeýden shaqyrylǵan. Kezinde iri tulǵalardyń kózin kórgen dárigerdiń sózinshe, qaýipsizdik komiteti músheleri "Qonaevqa, Asqarovqa bále jap, taǵylǵan aiypty alyp tastaimyz" dep qorqytqan.
"Ony birneshe ret aitty. Bekejanovty da aitty. Bekejanovpen qarym-qatynasym boldy. Ol taza jigit, óte jaqyn qatynasta bolmasam da azamat ekenin bilemin. Shynynda eshteńe bilmeitinmin. Kóp suraǵany - Qonaev pen Asqarov týraly. "Solardy ustaý úshin birdeńe taýyp ber" deidi. Odan keiin olar maǵan ashýlandy. Meni 12 jylǵa sottady. Máskeýde otyrdym. Baiaǵy anaý qazaqtyń ziialylaryn atqan túrme bar ǵoi. Lefortovo deidi. Basqa ulttar túrmesinde de otyrdym. Ólsem ólip keteiin, biraq erkek bolyp óleiin degen - ózimniń minezim. Men jaýymdy da satqan joqpyn. Ittik jasaǵandar boldy. Bir adamdy jamandaǵan joqpyn. Ashýlanǵany sonsha 12 jyl berdi. Odan keiin qaita jazdym, qaita tekserdi. Máskeýdiń ózi qaita tekserip, ózderi bildi. Qyrǵyzdan taza bolyp shyqtym", - deidi ol.
Onyń bul isine Qonaev jyly qabaq tanytyp, erekshe riza bolypty.
"Dimekeń "seniń kim týraly, ne týraly aitqanyń, men týraly qalai jaýap bergeniń, Asqarov týraly qandai suraqtar bergeni - barlyǵyn bilemin" dedi. "Erkekshe jaýap beripsiń, qatty riza boldym. Biraq jigitterdiń kóbi bir sózge kelmei synyp qaldy. Sen ondaiǵa barǵan joqsyń" dedi. Kóbi bir-birin satqan, - dedi Daiyrbekov.
Sondai-aq, Nazarbaev pen Qonaevtyń araqatynasy týraly da áńgimeledi.
"Qasynda óziniń balasyndai bolyp júrdi. Burylyp ketetinin bilgen joq, Dimekeń úlken senimmen qarady. Biraq senimin aqtady ma, aqtamady ma, el biledi", - dep qysqa qaiyrdy ol bul jóninde.
Músilim Daiyrbekov ortalyq klinikalyq aýrýhananyń bas dárigeriniń orynbasary, qalalyq stomatologiialyq emhananyń bas dárigeri qyzmetterin atqarǵan. Qonaevtyń kózine túsken ol biraz jylǵa sottalyp ketse de keiin bul jerdegi qyzmetterin qaitaryp alǵan.
