Sherzat Bolattyń ólimine qatysty ótip jatqan sot otyrysynda sottalýshy Shyńǵys Belgojaev sol túni bolǵan oqiǵanyń egjei-tegjeiin baiandady, dep habarlaidy Dalanews.kz.
Belgojaevtyń aitýynsha, 2024 jyly 3 qazannan 4-ine qaraǵan túni ol dosy Azamat Toqtaýbaevpen birge "Eiforiia" kafesine baryp, sol jerde bir top adammen kezdesken. Kafe jabylar sátte Nurbol Toqtaýbaev habarlasyp, Mendeleev kóshesindegi dúken mańynda bir jaǵdai bolǵanyn aityp, olardy shaqyrǵan.
"Kafe jabylarda Azamat Abzalǵa habarlasyp, avtobazaǵa shaqyrdy. "Qamajai" dúkenine barǵanymyzda 10 shaqty adam jinalyp turdy. Darhan Áskentaidyń beti qan edi. Ne bolǵanyn suraǵanymyzda, bireýler uryp ketkenin aitty. Sol sátte Qarjaýbai dúkennen pyshaqpen júgirip shyqty. Toqtaidy dep oilap, men de bákimdi shyǵaryp, ony qaita dúken ishine kirgizýge tyrystym. "Qoiyńdar, qoiyńdar, pyshaqty tasta" degenimizge qaramai, pyshaǵyn tastamaidy. Biraq ol pyshaqty tastamai qoidy. Onyń qolyndaǵy as úi pyshaǵy bolatyn", – dedi sottalýshy.
Belgojaev oqiǵanyń ári qarai tóbeleske ulasqanyn aitty. Onyń sózinshe, kim birinshi urǵanyn baiqai almaǵan. Osy kezde belgisiz bireý myltyqtan oq atyp, ekinshi oǵyn atqaly jatqanyn kórip, dúken janyndaǵy aǵash jaqqa qarai qashqan.
"Keiin bári alǵa qarai júre bastady. Men de solarǵa qosylyp júgirip bardym. Myltyq ustaǵan adamdy uramyn dep oiladym, biraq keiin videodan qarasam, Sherzatty urǵan ekenmin. Urdym, teptim. Sosyn "kettik, kettik" degen daýys estilgende, bárimiz kólikke otyryp, oqiǵa bolǵan jerden ketip qaldyq", - dedi ol.
