Memsatýdaǵy másele – zańnyń nasharlyǵynan emes, ony saqtamaýdan týyndaidy
Qarjy vitse-ministri Dáýren Keńbeiildiń aitýynsha, búginde memlekettik satyp alýlardyń 100%-y elektrondyq formatqa kóshirilip, ónim jetkizýshilerge qarjylyq turaqtylyq túrindegi biliktilik talaptary arttyryldy.
– Bul tiisti salyqtyq júktemesi bar jáne materialdyq jáne eńbek resýrstary jetkilikti jaqsy bedelge ie kompaniialardyń satyp alýǵa qatysýyna jaǵdai jasady. Sonymen qatar, áleýetti jetkizýshiler kóleńkeden shyǵýǵa yntalandyrylyp, somasy 28 mlrd teńgeden asatyn salyq erikti túrde tólendi, – dedi Dáýren Keńbeiil.
Ol sondai-aq sońǵy 5 jylda bir kózden memlekettik satyp alý úlesi 92%-dan 49%-ǵa deiin 2 esege derlik qysqarǵanyn aitty.
Alaida, Keńes tóraǵasy, Parlament Májilisiniń depýtaty Amanjan Jamalovtyń pikirinshe, bul faktilerdi jetistik dep aitý qiyn.
– Qalai bolǵanda da memlekettik satyp alýlardyń 51%-y bir kózden alý tásilimen júrgiziledi. Al bul – úlken soma. 2,5 jyl ishinde kameralyq baqylaý nátijesinde 78 myń satyp alý boiynsha zań buzýshylyqtyń joly kesildi. Bul degenińiz jalpy sommasy 2,4 trln teńgeni quraityn óte kóp aqsha. Munyń bári zańnyń nasharlyǵynan emes, ony júieli túrde buzatyndyǵyn bildiredi. Satyp alýǵa qatysýshylardyń jaýapkershiligin kúsheitý qajet shyǵar, – dedi Amanjan Jamalov.
Keńes músheleri «Nur Otan» partiasynyń sailaýaldy baǵdarlamasyn oryndaý boiynsha Jol kartasynda kózdelgen satyp alýdyń biryńǵai terezesin engizý máselesin jeke talqylady.
Jol kartasy aiasynda biyl memlekettik organdar, memkompaniialar jáne jer qoinaýyn paidalanýshylar tarapynan otandyq óndirýshilerdiń somasy 21 mlrd teńgeni quraityn ónimderin kepildi satyp alýdy qamtamasyz etý mindeti tur.
Jiyn barysynda Indýstriia jáne infraqurylymdyq damý ministrliginiń ókili bul kórsetkish merziminen buryn oryndalǵanyn jetkizdi. Sebebi, birinshi jartyjyldyqta tapsyrys berýshiler men jetkizýshiler arasynda 23,8 mlrd.teńge somasyna 25 uzaq merzimdi shart jasalǵan.
Otyrys qorytyndysy boiynsha Keńes músheleri Qarjy, Ulttyq ekonomika, Indýstriia jáne infraqurylymdyq damý ministrlikterine biryńǵai satyp alý terezesi júiesin odan ári jetildirý jónindegi jumysty jedeldetýdi usyndy.
