قارجى ۆيسە-مينيسترى داۋرەن كەڭبەيىلدىڭ ايتۋىنشا، بۇگىندە مەملەكەتتىك ساتىپ الۋلاردىڭ 100%-ى ەلەكتروندىق فورماتقا كوشىرىلىپ، ءونىم جەتكىزۋشىلەرگە قارجىلىق تۇراقتىلىق تۇرىندەگى بىلىكتىلىك تالاپتارى ارتتىرىلدى.
– بۇل ءتيىستى سالىقتىق جۇكتەمەسى بار جانە ماتەريالدىق جانە ەڭبەك رەسۋرستارى جەتكىلىكتى جاقسى بەدەلگە يە كومپانيالاردىڭ ساتىپ الۋعا قاتىسۋىنا جاعداي جاسادى. سونىمەن قاتار، الەۋەتتى جەتكىزۋشىلەر كولەڭكەدەن شىعۋعا ىنتالاندىرىلىپ، سوماسى 28 ملرد تەڭگەدەن اساتىن سالىق ەرىكتى تۇردە تولەندى، – دەدى داۋرەن كەڭبەيىل.
ول سونداي-اق سوڭعى 5 جىلدا ءبىر كوزدەن مەملەكەتتىك ساتىپ الۋ ۇلەسى 92%-دان 49%-عا دەيىن 2 ەسەگە دەرلىك قىسقارعانىن ايتتى.
الايدا، كەڭەس ءتوراعاسى، پارلامەنت ءماجىلىسىنىڭ دەپۋتاتى امانجان جامالوۆتىڭ پىكىرىنشە، بۇل فاكتىلەردى جەتىستىك دەپ ايتۋ قيىن.
– قالاي بولعاندا دا مەملەكەتتىك ساتىپ الۋلاردىڭ 51%-ى ءبىر كوزدەن الۋ تاسىلىمەن جۇرگىزىلەدى. ال بۇل – ۇلكەن سوما. 2،5 جىل ىشىندە كامەرالىق باقىلاۋ ناتيجەسىندە 78 مىڭ ساتىپ الۋ بويىنشا زاڭ بۇزۋشىلىقتىڭ جولى كەسىلدى. بۇل دەگەنىڭىز جالپى سومماسى 2،4 ترلن تەڭگەنى قۇرايتىن وتە كوپ اقشا. مۇنىڭ ءبارى زاڭنىڭ ناشارلىعىنان ەمەس، ونى جۇيەلى تۇردە بۇزاتىندىعىن بىلدىرەدى. ساتىپ الۋعا قاتىسۋشىلاردىڭ جاۋاپكەرشىلىگىن كۇشەيتۋ قاجەت شىعار، – دەدى امانجان جامالوۆ.
كەڭەس مۇشەلەرى «Nur Otan» پارتياسىنىڭ سايلاۋالدى باعدارلاماسىن ورىنداۋ بويىنشا جول كارتاسىندا كوزدەلگەن ساتىپ الۋدىڭ ءبىرىڭعاي تەرەزەسىن ەنگىزۋ ماسەلەسىن جەكە تالقىلادى.
جول كارتاسى اياسىندا بيىل مەملەكەتتىك ورگاندار، مەمكومپانيالار جانە جەر قويناۋىن پايدالانۋشىلار تاراپىنان وتاندىق وندىرۋشىلەردىڭ سوماسى 21 ملرد تەڭگەنى قۇرايتىن ونىمدەرىن كەپىلدى ساتىپ الۋدى قامتاماسىز ەتۋ مىندەتى تۇر.
جيىن بارىسىندا يندۋستريا جانە ينفراقۇرىلىمدىق دامۋ مينيسترلىگىنىڭ وكىلى بۇل كورسەتكىش مەرزىمىنەن بۇرىن ورىندالعانىن جەتكىزدى. سەبەبى، ءبىرىنشى جارتىجىلدىقتا تاپسىرىس بەرۋشىلەر مەن جەتكىزۋشىلەر اراسىندا 23،8 ملرد.تەڭگە سوماسىنا 25 ۇزاق مەرزىمدى شارت جاسالعان.
وتىرىس قورىتىندىسى بويىنشا كەڭەس مۇشەلەرى قارجى، ۇلتتىق ەكونوميكا، يندۋستريا جانە ينفراقۇرىلىمدىق دامۋ مينيسترلىكتەرىنە ءبىرىڭعاي ساتىپ الۋ تەرەزەسى جۇيەسىن ودان ءارى جەتىلدىرۋ جونىندەگى جۇمىستى جەدەلدەتۋدى ۇسىندى.
