Májilis depýtaty Samat Nurtaza Qazaqstandaǵy bilim berý uiymdarynyń qaýipsizdigine qatysty másele kóterip, mektepter men balabaqshalar mańynda patrýldeýdi kúsheitýdi usyndy, dep habarlaidy Dala News.
Depýtattyń aitýynsha, sońǵy ýaqytta ata-analar men qoǵamdy alańdatqan qaýipsizdik deńgeii birizdi standarttyń joqtyǵyn kórsetip otyr. Kóp jaǵdaida oqý oryndaryndaǵy kúzet qyzmetin zeinet jasyndaǵy adamdar atqarady, al tómen jalaqy saldarynan bul salaǵa kásibi mamandardy tartý qiyn.
Sonymen qatar, eldegi bilim berý uiymdarynyń basym bóliginde kirip-shyǵýdy baqylaýǵa arnalǵan tehnikalyq quraldar joq.
«Kóptegen mektepter men joǵary oqý oryndarynda metall izdegish sekildi qarapaiym tekserý jabdyqtary da qarastyrylmaǵan. Bul – úlken olqylyq», – dedi depýtat Májilis otyrysynda.
Samat Nurtaza Almatydaǵy joǵary oqý oryndarynyń birinde bolǵan sońǵy oqiǵany mysalǵa keltirdi. Ol kezde stýdent oqý ornyna pyshaqpen kirip, oqytýshyǵa shabýyl jasaǵan. Buǵan qosa, jyl basynan beri áleýmettik jelilerde bilim berý uiymdaryna qatysty jalǵan shabýyl týraly habarlamalar birneshe ret taraǵan.
«Mundai qaýesetter ata-analar, stýdentter men ustazdar arasynda jappai úrei týǵyzdy. Bul da qaýipsizdik júiesiniń álsiz ekenin kórsetedi», – dedi depýtat.
Osyǵan bailanysty depýtat birqatar naqty usynys aitty. Atap aitqanda:
•bilim berý uiymdarynyń qaýipsizdigine arnalǵan biryńǵai ulttyq standart engizý;
•balabaqsha men mektepterdi kúzetý qyzmetin tek arnaiy litsenziiasy bar uiymdarǵa tapsyrý;
•barlyq bilim berý mekemelerinde, sonyń ishinde balabaqshalarda mindetti tekserý jabdyqtaryn ornatý;
•oqý oryndary ornalasqan aýmaqtarda politsiia patrýlin kúsheitý.
Depýtattyń pikirinshe, bul sharalar balalar men pedagogterdiń qaýipsizdigin qamtamasyz etýge jáne qoǵamdaǵy alańdaýshylyqty azaitýǵa múmkindik beredi.
