Qazaqstandyq óndirýshiler úshin Mońǵoliia naryǵyna shyǵý aitarlyqtai jeńildedi, dep habarlaidy Dala News.
Májilis EAEO men Mońǵoliia arasyndaǵy ýaqytsha saýda kelisimin ratifikatsiialady, bul qujat Qazaqstan úshin eksport geografiiasyn keńeitýge, azyq-túlik qaýipsizdigin kúsheitýge jáne óńirlik ekonomikalyq yqpaldy arttyrýǵa baǵyttalǵan mańyzdy qadam sanalady.
Májilis depýtaty Nurgúl Taý kelisimniń strategiialyq sipatyna toqtaldy. Onyń aitýynsha, Mońǵoliia Qazaqstan úshin tek kórshi memleket emes, Aziia baǵytyndaǵy senimdi ekonomikalyq seriktes.
Kelisim qazaqstandyq taýarlarǵa Mońǵoliia naryǵynda kedendik jeńildikter beredi. Endi otandyq óndirýshiler bidai, arpa, júgeri, un, makaron jáne konditerlik ónimderdi baj salyǵynsyz eksporttai alady. Buǵan deiin bul taýarlar qosymsha kedendik tólemderge ushyrap kelgen.
Depýtattyń sózinshe, kelisim tek saýda kólemin ulǵaityp qoimai, qosylǵan quny joǵary ónimderge negizdelgen jańa ekonomikalyq tizbekterdi qalyptastyrýǵa múmkindik beredi. Bul Qazaqstannyń shikizatqa táýeldiligin azaityp, óńdeýshi sektordyń damýyna serpin beredi.
Saýda jáne integratsiia ministriniń mindetin atqarýshy Janel Kýshakovanyń málimetinshe, qujat EAEO elderi men Mońǵoliia arasynda 367 taýar pozitsiiasy boiynsha importtyq bajdardy alyp tastaýdy kózdeidi. Kelisim úsh jylǵa jasalyp, taraptardyń kelisimimen avtomatty túrde taǵy úsh jylǵa uzartylýy múmkin.
Qujatta tehnikalyq retteý, sanitarlyq jáne fitosanitarlyq talaptar, kedendik yntymaqtastyq jáne ishki naryqty qorǵaý tetikteri de qamtylǵan. Ministrlik ókilderi kelisimdi iske asyrý respýblikalyq biýdjetke qosymsha salmaq salmaitynyn atap ótti.
Sarapshylardyń pikirinshe, bul sheshim Qazaqstannyń Mońǵoliiadaǵy pozitsiiasyn kúsheitip qana qoimai, eldiń azyq-túlik eksportyn Aziia naryqtaryna júieli túrde shyǵarýǵa jol ashady. Aldaǵy kezeńde eki el arasyndaǵy taýar ainalymyn 500 mln dollarǵa deiin arttyrý kózdelip otyr.
