Almaty qalasynda QR Parlamenti Májilisiniń depýtattary men Konstitýtsiialyq reforma jónindegi komissiia ókilderiniń qala Qoǵamdyq keńesiniń múshelerimen kezdesýi ótti, dep habarlaidy Dala News.
Kezdesý barysynda qoǵamdyq talqylaýǵa shyǵarylǵan Konstitýtsiiaǵa engiziletin túzetýler, sondai-aq jańartylǵan memlekettik-quqyqtyq modeldi qalyptastyrýdaǵy azamattyq qoǵamnyń róli keńinen talqylandy. Qatysýshylar jańa Konstitýtsiia jobasyn qoldap, bul reformany eldiń saiasi jańǵyrýyndaǵy negizgi kezeńderdiń biri retinde baǵalady.
Talqylaý kezinde bilik tarmaqtary arasyndaǵy ókilettikterdi qaita bólý, Parlamenttiń rólin kúsheitý, azamattardyń quqyqtary men bostandyqtaryna beriletin kepildikterdi keńeitý, sondai-aq memlekettik institýttardyń ashyqtyǵy men eseptiligin arttyrý máseleleri qozǵaldy.
Májilis depýtaty Ermurat Bápi konstitýtsiialyq reformalar aiasynda ashyq ári jaýapty qoǵamdyq dialogtyń mańyzdylyǵyna toqtaldy. Onyń aitýynsha, reformalardyń turaqty ári zańdy júzege asýy qoǵamnyń belsendi qatysýyna tikelei bailanysty.
– Syndarly synǵa shekteý bolmaýy tiis. Ashyq talqylaý múmkindiginiń ózin qoǵamdyq qundylyq retinde baǵalaýymyz qajet. Tek dialog arqyly ǵana qoǵam qabyldaityn jáne uzaq merzimde tiimdi jumys isteitin sheshimderge qol jetkizýge bolady, – dedi Ermurat Bápi.
Sonymen qatar ol reformalar kezeńinde qoǵamdyq kelisimdi saqtaý jáne sezimtal taqyryptar tóńireginde alypsatarlyqqa jol bermeý qajettigin atap ótti.
Májilis depýtaty Erlan Sairov usynylyp otyrǵan konstitýtsiialyq ózgeristerdiń syrtqy syn-qaterler jaǵdaiynda eldiń turaqtylyǵy men aýmaqtyq tutastyǵyn qamtamasyz etýge baǵyttalǵanyn aitty.
– Jańa Konstitýtsiia jobasynda jahandyq turaqsyzdyq jaǵdaiynda memlekettiń qaýipsizdigin, tutastyǵyn saqtaýǵa arnalǵan tetikter qarastyrylǵan, – dedi ol.
Kezdesý barysynda Konstitýtsiia preambýlasynyń mazmunyna da erekshe nazar aýdaryldy. Konstitýtsiialyq reforma jónindegi komissiia múshesi Únzila Shapaq preambýla Ata zańnyń qundylyqtyq baǵytyn aiqyndaitynyn atap ótti.
– Konstitýtsiia – memleket pen halyq arasyndaǵy qoǵamdyq kelisimniń kórinisi. Sondyqtan preambýlada ult birligi, memlekettiń ýnitarlyq sipaty men aýmaqtyq tutastyq naqty bekitilýi tiis, – dedi ol.
Qoǵamdyq keńes músheleri Qazaqstannyń saiasi jáne áleýmettik damýdyń jańa kezeńine aiaq basqanyn atap ótip, osy ózgeristerdiń qazirgi zaman talaptaryna jaýap beretinin jetkizdi. Sondai-aq jastardy talqylaý protsesine belsendi tartý men reformalardyń mánin qoǵamǵa túsinikti tilde jetkizýdiń mańyzy aityldy.
Kezdesý qorytyndysy boiynsha qatysýshylar usynylyp otyrǵan konstitýtsiialyq túzetýlerdi qoldap, mundai dialog alańdary sarapshylar men qoǵamdyq qaýymdastyqtyń pikirin eskerýge múmkindik beretinin atap ótti.
