الماتى قالاسىندا ق ر پارلامەنتى ءماجىلىسىنىڭ دەپۋتاتتارى مەن كونستيتۋسيالىق رەفورما جونىندەگى كوميسسيا وكىلدەرىنىڭ قالا قوعامدىق كەڭەسىنىڭ مۇشەلەرىمەن كەزدەسۋى ءوتتى، دەپ حابارلايدى Dala News.
كەزدەسۋ بارىسىندا قوعامدىق تالقىلاۋعا شىعارىلعان كونستيتۋسياعا ەنگىزىلەتىن تۇزەتۋلەر، سونداي-اق جاڭارتىلعان مەملەكەتتىك-قۇقىقتىق مودەلدى قالىپتاستىرۋداعى ازاماتتىق قوعامنىڭ ءرولى كەڭىنەن تالقىلاندى. قاتىسۋشىلار جاڭا كونستيتۋسيا جوباسىن قولداپ، بۇل رەفورمانى ەلدىڭ ساياسي جاڭعىرۋىنداعى نەگىزگى كەزەڭدەردىڭ ءبىرى رەتىندە باعالادى.
تالقىلاۋ كەزىندە بيلىك تارماقتارى اراسىنداعى وكىلەتتىكتەردى قايتا ءبولۋ، پارلامەنتتىڭ ءرولىن كۇشەيتۋ، ازاماتتاردىڭ قۇقىقتارى مەن بوستاندىقتارىنا بەرىلەتىن كەپىلدىكتەردى كەڭەيتۋ، سونداي-اق مەملەكەتتىك ينستيتۋتتاردىڭ اشىقتىعى مەن ەسەپتىلىگىن ارتتىرۋ ماسەلەلەرى قوزعالدى.
ءماجىلىس دەپۋتاتى ەرمۇرات ءباپي كونستيتۋسيالىق رەفورمالار اياسىندا اشىق ءارى جاۋاپتى قوعامدىق ديالوگتىڭ ماڭىزدىلىعىنا توقتالدى. ونىڭ ايتۋىنشا، رەفورمالاردىڭ تۇراقتى ءارى زاڭدى جۇزەگە اسۋى قوعامنىڭ بەلسەندى قاتىسۋىنا تىكەلەي بايلانىستى.
– سىندارلى سىنعا شەكتەۋ بولماۋى ءتيىس. اشىق تالقىلاۋ مۇمكىندىگىنىڭ ءوزىن قوعامدىق قۇندىلىق رەتىندە باعالاۋىمىز قاجەت. تەك ديالوگ ارقىلى عانا قوعام قابىلدايتىن جانە ۇزاق مەرزىمدە ءتيىمدى جۇمىس ىستەيتىن شەشىمدەرگە قول جەتكىزۋگە بولادى، – دەدى ەرمۇرات ءباپي.
سونىمەن قاتار ول رەفورمالار كەزەڭىندە قوعامدىق كەلىسىمدى ساقتاۋ جانە سەزىمتال تاقىرىپتار توڭىرەگىندە الىپساتارلىققا جول بەرمەۋ قاجەتتىگىن اتاپ ءوتتى.
ءماجىلىس دەپۋتاتى ەرلان سايروۆ ۇسىنىلىپ وتىرعان كونستيتۋسيالىق وزگەرىستەردىڭ سىرتقى سىن-قاتەرلەر جاعدايىندا ەلدىڭ تۇراقتىلىعى مەن اۋماقتىق تۇتاستىعىن قامتاماسىز ەتۋگە باعىتتالعانىن ايتتى.
– جاڭا كونستيتۋسيا جوباسىندا جاھاندىق تۇراقسىزدىق جاعدايىندا مەملەكەتتىڭ قاۋىپسىزدىگىن، تۇتاستىعىن ساقتاۋعا ارنالعان تەتىكتەر قاراستىرىلعان، – دەدى ول.
كەزدەسۋ بارىسىندا كونستيتۋسيا پرەامبۋلاسىنىڭ مازمۇنىنا دا ەرەكشە نازار اۋدارىلدى. كونستيتۋسيالىق رەفورما جونىندەگى كوميسسيا مۇشەسى ءۇنزيلا شاپاق پرەامبۋلا اتا زاڭنىڭ قۇندىلىقتىق باعىتىن ايقىندايتىنىن اتاپ ءوتتى.
– كونستيتۋسيا – مەملەكەت پەن حالىق اراسىنداعى قوعامدىق كەلىسىمنىڭ كورىنىسى. سوندىقتان پرەامبۋلادا ۇلت بىرلىگى، مەملەكەتتىڭ ۋنيتارلىق سيپاتى مەن اۋماقتىق تۇتاستىق ناقتى بەكىتىلۋى ءتيىس، – دەدى ول.
قوعامدىق كەڭەس مۇشەلەرى قازاقستاننىڭ ساياسي جانە الەۋمەتتىك دامۋدىڭ جاڭا كەزەڭىنە اياق باسقانىن اتاپ ءوتىپ، وسى وزگەرىستەردىڭ قازىرگى زامان تالاپتارىنا جاۋاپ بەرەتىنىن جەتكىزدى. سونداي-اق جاستاردى تالقىلاۋ پروسەسىنە بەلسەندى تارتۋ مەن رەفورمالاردىڭ ءمانىن قوعامعا تۇسىنىكتى تىلدە جەتكىزۋدىڭ ماڭىزى ايتىلدى.
كەزدەسۋ قورىتىندىسى بويىنشا قاتىسۋشىلار ۇسىنىلىپ وتىرعان كونستيتۋسيالىق تۇزەتۋلەردى قولداپ، مۇنداي ديالوگ الاڭدارى ساراپشىلار مەن قوعامدىق قاۋىمداستىقتىڭ پىكىرىن ەسكەرۋگە مۇمكىندىك بەرەتىنىن اتاپ ءوتتى.
