Májilis depýtaty Maqsat Tolyqbai eldegi keiingi saiasi ózgerister, rezonansty taqyryptar tóńireginde ashyq suhbat berdi, – dep habarlaidy Dalanews.kz.
Jýyrda Erbolat Dosaev Almaty ákimi qyzmetinen ketti. Depýtat eks-ákimniń jumysyna baǵa berdi.
"Dosaevqa ártúrli baǵa berip jatyr. Dosaev - birinshi kezekte pragmatikalyq kózqarastaǵy, ekonomikalyq logikasy basymyraq saiasatker. Ol eshqashan Saparbaev siiaqty ákim bola almaidy. Óitkeni sharýashylyqtan alystaý. Ol kisiniń birbetkeiligi, dórekiligi kóp aitylyp jatyr ǵoi", - dedi Maqsat Tolyqbai BILGEN DURYS arnasyna bergen suhbatynda.
Sondai-aq, onyń pikirinshe, jańadan ákim bop kelgen Darhan Satybaldy ekeýiniń basqarý stili eki bólek.
"Qumyranyń ekinshi jaǵynan baǵa berýimiz kerek shyǵar. Darhan Satybaldynyń Almatydai eń iri megapoliske ákim bop kelýi jańa saiasi elita qalyptasa bastaǵanyn kórsetedi. Óitkeni Nazarbaevtyń ainalasyndaǵy eń iri oligarh toptardyń saiasi oiynnan yǵystyryla bastaǵanynyń kórsetkishi bul. Óitkeni ol Toqaevtyń dáýirinde keldi. Elshi boldy. Túrkistan oblysynyń damý baspaldaqtaryn kórip otyrǵan shyǵarsyzdar. ...Toqaevtyń ainalasyndaǵy saiasi elitanyń kelisimimen kelgen adam", - dedi sarapshy BILGEN DURYS arnasyna bergen suhbatynda.
Depýtat jurttyń osy ózgeriske qatysty "Almatyny nege "chimkentskii" basqarýy kerek?" degen pikirine qatysty óz oiyn aitty.
"Osy kózqarastan ketýimiz kerek. Sailaý dese de osylai shyǵamyz. Árnárseden qorqyp otyra bersek, damý bolmaidy. Sot salasyna bailanysty bolsyn, ákimdikke bailanysty bolsyn. Darhan Satybaldynyń basqarý stili bólek. Túrkistan - eń iri oblys. Úsh million halqy bar. Ol jaqta da ártúrli klandyq toptar bar, aqsaqaldar institýty qatty damyǵan. Sonyń bárinen ótti. Qazaqstanda aqshaǵa satyp ala almaityn bir-aq nárse bar: ol - tájiribe. Tájiribesi bar, diplomat. Almatydaǵy úlken ziialy qaýymnyń da tilin tabatyn shyǵar dep oilaimyz", - deidi Maqsat Tolyqbai suhbat barysynda.
Osy tusta depýtat Shymkenttegi jaǵdaidy da ainalyp ótpedi. Biraz ýaqyt buryn Shymkent ákimniń orynbasary Rýslan Berdenovke shabýyl jasaldy.
"Jeke bastyń máselesi de bolýy múmkin. Ekinshi taraptan da aqparat jinattyq. Ol da kásiptiń ainalasynda júrgen, tenderdiń ainalasynda júrgen, jaǵdaiy jaman emes azamat. Rýslan Berdenov óte bilikti, bilimdi azamat ekenin bilesizder. Óziniń ustanymy bar. Kásipten kelgen azamat, jalaqyǵa qyzyǵyp barǵan adam emes. Týǵan jerine qyzmet etkisi kelgen shyǵar. "Shymkenttegi jemqorlyqty toqtatýǵa bar kúsh-jigerimdi salamyn" dep birinshi kúni bergen suhbatynda da jii qaitalap aitty. Múmkin jergilikti azamattarǵa jaqpai qalǵan shyǵar. "Jumys istegiń kelmese, ornyńdy bosat" degen áńgimeler shyqqany da aityldy. Oqiǵanyń basy-qasynda bolmaǵannan keiin syrttan otyryp topshylaý etikalyq turǵydan durys emes shyǵar. Sot bolady, sol kezde esti jatarmyz", - dedi ol.
Depýtat biraz ýaqyt buryn osy qyzmet boiynsha ózine de usynys túskenin jasyrmady.
"Usynys jasalǵany ras. Nege Shymkent degen de suraq týyndaidy. Úsh uiyqtasam túsime kirmeitin dúnie. Biraq qazir kelgen ákim Ǵabit Syzdyqbekov - qyzyq personaj. Ártúrli áńgime bolǵany da ras. Ol jaqta otyz jyldan beri qalyptasqan úlken klandar, toptar bar. "Jastaý ákim qalai bolady eken, basqaryp kete ala ma?" dedi. Biraq kelgennen bastap minez kórsetti. Shymkentke jii baramyn, halyqtyń da pikirin tyńdaimyn. Óte isker. Talap qoia alady. Kele sala úlken-úlken klandarmen kúresti. Ony moiyndaý kerek. Eshkim otyz jylda tisi batpaityn, keibir azamattardyń zańsyz salynǵan ǵimarattaryna deiin buzyp tastady. Moiyndatty. Qazir bári sanasady. Ekeýara áńgime bolǵany da ras. Usynys keldi. Men de oilandym, basshylyqpen aqyldastym. ...Eki-aq jyl otyrdyq qoi (depýtat retinde - esk.). Bitpei qalǵan jumys kóp. "Usynysyńyzǵa raqmet, aldaǵy ýaqytta kórermiz" degen syńaida barlyǵyn túsindirip aittym", - dedi Maqsat Tolyqbai.
