Mańǵystaý oblysy kásipkerler palatasy baspasóz qyzmetiniń málimetinshe, sapar barysynda qazaqstandyq tarap Estoniianyń memlekettik qyzmetter salasynda tsifrlyq keńistik qurý, meditsinanyń elektrondyq júieleri, salyq, kedendik ákimshilendirý, bilim berý, kólik logistikasy, sondai-aq tehnologiialyq habtardy qalyptastyrý tájiribesimen tanysqan.
Estoniia tarapy da bolashaqta qos el arasyndaǵy aqparat almasýdy jáne bailanystardy ózektendirý úshin osyndai is-sharalardyń mańyzdylyǵyna nazar aýdardy.
Shara barysynda qazaqstandyq «Mediana Services Limited» IT kompaniiasy men Estoniianyń «IN Deal OÜ» arasynda yntymaqtastyq týraly memorandýmǵa qol qoiǵanyn aita ketýimiz kerek. Osylaisha qazaqstandyq IT sheshimder tiisti deńgeide jáne Eýropa elderine eksporttaýda úlken áleýetke ie boldy.
– Qol jetkizilgen qujat eki jaqty yntymaqtastyq jobalardy iske asyrýǵa, bizdiń kompaniianyń IT ónimderin Estoniiaǵa jáne Eýroodaq naryqtaryna shyǵarýǵa, estondyq biznes-áriptesimizdiń qazaq naryǵyna kelýine yqpal etedi. Naqty aitsaq, Tallinn qalasynda keńsemizdi ashyp, eki IT-ónimimizdi Eýropa naryǵyna beiimdep eksportqa shyǵarýdy qolǵa alamyz. Kásiporyndarǵa arnalǵan korporativtik smart IoT sheshimderimiz jáne bilim berý salasyndaǵy balabaqshalarǵa arnalǵan interaktivtik-baǵdarlamalyq jobamyz bar. Osy eki jobamen naryqqa qadam bastap jatyrmyz, – dedi «Mediana Services Limited» IT komaniiasynyń jetekshisi Ómirbek Qurbanbaev.
Bul kelisim eki eldiń elshilikteri men Astana diplomatiialyq klýby birlesip Estoniianyń tsifrlyq tájiribesin zerdeleý sheńberinde uiymdastyrǵan qazaqstandyq delegatsiianyń 2021 jylǵy qarashadaǵy saparynyń jemisi.
