AQSh-tyń Illinois shtatynda 24 jastaǵy qazaqstandyq Áset Quralbaidyń joǵalyp ketkeni belgili boldy. Týystary onyń iz-túzsiz ketkeni týraly Threads áleýmettik jelisinde jazǵan. Olardyń aitýynsha, Áset sońǵy ret 2 maýsymda bailanysqa shyqqan, al 7 maýsymnan bastap telefony sóndirýli bolǵan, dep dalanews.kz tilshisi kznews.kz saityna silteme jasap habarlaidy.
Ásettiń ápkesi Alina Quralbai Newtimes.kz basylymyna bergen suhbatynda inisiniń AQSh-ta tórt jyldan beri turǵanyn aitty. Ol Amerikaǵa Work&Travel baǵdarlamasy arqyly baryp, keiin sol jaqta qalýdy sheshken. Áset Amazon kompaniiasynda kýrer bolyp jumys istegen.
Jaqyndarynyń sózinshe, sońǵy ýaqytta jigittiń minez-qulqynda ózgeris baiqalǵan. Kórshileri onyń kópshilikpen aralasa bermeitinin, keiingi kezde tipti tuiyqtala túskenin aitqan.
"Bizge onyń eshkimmen aralaspaitynyn aitty. Kúni boiy uiyqtap, túnde oiaý júretin bolǵan. Úi iesi: "Túngi úsh-tórtte kelsem, ol shatyrda temeki shegip otyrady" dedi", – dep jetkizdi ápkesi.
Alinanyń aitýynsha, Áset birtindep habarlamalarǵa jaýap berýdi toqtatqan. Al 7 maýsymnan keiin oǵan jiberilgen habarlamalar múlde jetpei qalǵan. Birneshe kún ótken soń týystary politsiiaǵa onyń joǵalǵany týraly aryz túsirgen.
Keiin politseiler Ásettiń kóligin úiinen shamamen bes minýttyq jerden tapqan. Málimet boiynsha, kólikti belgisiz bir áiel aidap aparǵan. Sonymen qatar onyń úiinen jazba tabylǵan.
"Jazbada: "Eger maǵan birdeńe bolsa, qujattarym men zattarymdy myna mekenjaiǵa jetkizińizder" dep jazylǵan. Niý-Iorkte jeńgemiz turady, ol sonyń bailanys derekterin kórsetken. Politsiia jazbanyń jańa ekenin, janynda qalam jatqanyn aitty", – dedi Alina.
Qazaqstan Syrtqy ister ministrligi diplomattar oqiǵanyń mán-jaiyn anyqtap jatqanyn habarlady. Keiinirek ministrlik AQSh quqyq qorǵaý organdary Qazaqstan azamaty bolýy múmkin adamnyń denesin tapqanyn málimdedi.
SIM málimetinshe, qazaqstandyq diplomattar AQSh-tyń quzyrly organdarymen jáne azamattyń týystarymen turaqty bailanysta. Jaqyndaryna qajetti konsýldyq-quqyqtyq kómek kórsetilip jatyr.
