Japoniianyń belgili jazýshysy, rejisser ári bedeldi ádebi syilyqtardyń iegeri Riý Mýrakami 74 jasynda dúnieden ótti. Qalamgerdiń qazasy týraly Gentosha baspa úii resmi habarlady, dep jazady dalanews.kz.
Baspa ókilderiniń málimetinshe, jazýshy 2026 jyldyń 17 qazanynda óz úiinde qaitys bolǵan. Onyń dúnieden ótkeni týraly aqparat 23 qazanda jariialandy.
Marqummen qoshtasý rásimi otbasy músheleri men jaqyndarynyń qatysýymen ótken. Jazýshynyń týystary kópshilikten otbasynyń jeke ómirine qurmetpen qaraýdy surady.
Sondai-aq olar gúl shoqtaryn, aqshalai qaiyrymdylyq pen kóńil aitý hattaryn jibermeýdi jáne jýrnalisterden suhbat alý úshin mazalamaýdy ótingen.
Qalamgerdiń ólim sebebi ázirge jariialanǵan joq.
Riý Mýrakami kim bolǵan?
Riý Mýrakami 1952 jyly Japoniianyń Nagasaki prefektýrasyndaǵy Sasebo qalasynda dúniege kelgen.
Ol jastaiynan ádebietke qyzyǵýshylyq tanytyp, keiin Japoniianyń zamanaýi ádebietindegi tanymal qalamgerlerdiń birine ainaldy.
1976 jyly jazýshynyń alǵashqy romany – «Sheksiz móldir kók» jaryq kórdi. Bul týyndy jas jazýshyǵa birden tanymaldyq ákeldi.
Roman Japoniiadaǵy eń bedeldi ádebi marapattardyń biri – Akýtagava atyndaǵy syilyqqa ie boldy. Shyǵarma milliondaǵan danamen taralyp, oqyrmandar arasynda keńinen tanyldy.
Riý Mýrakami shyǵarmalarynda qoǵamdaǵy qaishylyqtardy, jastardyń ómirin, jalǵyzdyqty, zorlyq-zombylyq pen adam psihologiiasyndaǵy kúrdeli máselelerdi jii qozǵaǵan.
Onyń erekshe jazý máneri men ótkir taqyryptary kóptegen oqyrmannyń nazaryn aýdardy.
Jazýshynyń eń tanymal shyǵarmalary
Riý Mýrakami shyǵarmashylyq ǵumyrynda 40-tan astam roman jazǵan.
Onyń keńinen belgili týyndylarynyń qatarynda «Sheksiz móldir kók», «Júk saqtaityn uiashyqtaǵy balalar» jáne «Miso-sorpada» romandary bar.
1980 jyly jaryq kórgen «Júk saqtaityn uiashyqtaǵy balalar» shyǵarmasy da joǵary baǵalanyp, jazýshyǵa Noma atyndaǵy ádebi syilyqty alyp keldi.
Al «Miso-sorpada» romany úshin ol 1998 jyly Iomiýri ádebi syilyǵyna ie boldy.
Qalamgerdiń shyǵarmalary birneshe tilge aýdarylyp, Japoniiadan tys jerlerdegi oqyrmandarǵa da tanyldy.
Ádebietten bólek kino men teledidarda eńbek etti
Riý Mýrakami tek jazýshylyqpen shektelmei, rejissýra salasynda da jumys istegen. Ol óz shyǵarmalarynyń jelisi boiynsha túsirilgen filmderge qatysqan.
Sonymen qatar jasóspirimderge mamandyq tańdaýǵa kómektesetin «13 jastaǵylarǵa arnalǵan Hello Work» atty tanymdyq kitap jazdy. Bul eńbek Japoniiada keń taralyp, kópshilikke tanymal boldy.
Jazýshy shamamen 20 jyl boiy japon televiziiasyndaǵy «Kambrii saraiy» ekonomikalyq baǵdarlamasyn júrgizgen. Baǵdarlamada kásipkerlermen, kompaniia basshylarymen jáne túrli sala mamandarymen suhbattasqan.
2026 jyldyń kókteminde ol telejobadaǵy júrgizýshilik qyzmetin aiaqtaǵan bolatyn.
Riý Mýrakami ádebiet, kino jáne televiziia salalarynda uzaq jyl eńbek etip, Japoniianyń mádeni ómirinde ózindik iz qaldyrdy.
