Qazaqstan Ulttyq Banki tóraǵasynyń orynbasary Berik Sholpanqulov Senat dálizinde jýrnalıserge bergen suqbatynda krıptovalútalardyń bırjadan tys zańdy qozǵalysyna jol beretin steıblkoın týrasynda aıtty, dep habarlaıdy Dalanews.kz.
Ol bul másele boıynsha Ulttyq Bank retteletin jáne rettelemeıtin tetikterge ıe halyqaralyq tájirıbe men quqyq praktıkasyn zerttegenin atap ótti.
"Biz ınovasıalardyń qarjy naryǵyna óte tez jáne belsendi túrde dendep enip jatqanyn kórip otyrmyz. Tutastaı alǵanda, birinshi kózqarasymyz qalyptasty, naryqqa qatysýshylarmen kezdesip, kim qandaı usynystar jasaı alady,sony bildik,onyń bárine retteýshi kezeń aıasynda beıimdelemiz. Eń bastysy, qańqasyn túzip alsaq, sodan soń quqyqtyq jaǵyna kóshemiz. Zań jobasyn 2025 jyldyń tamyzynda talqyǵa usynbaqpyz", - dedi Berik Sholpanqulov.
Ol Qazaqstanda krıptovalúta naryǵynyń kólemi boıynsha naqty derekter joq ekenin basa aıtty.
"Kórshi elderdiń tájirıbesine súıenip jasaǵan esepteýler boıynsha, bir jerde mıllıard dollar, bir jerde jarty mıllıon dollar aınalym týraly boljam bar. Eń bastysy, "kóleńkeli" naryqtyń bar ekenin bilemiz jáne adamdar onlaın-saıttar arqyly belsendi túrde bıtkoınder men basqa da sıfrlyq aktıvterdi satyp alyp, tutynyp júr. Joǵary ataǵan usynystardy iske qosqan kezde biz osy "kóleńkeli" naryqty anaǵurlym transparentti etýge tyrysamyz jáne barlyq qatysýshylar men qarapaıym azamattarǵa aktıvterdi alańsyz satýǵa jáne satyp alýǵa múmkindik beremiz dep senemiz", – dep atap ótti Berik Sholpanqulov.
Onyń aıtýynsha, bul ınvestısıa jasaýdyń taǵy bir quraly bolmaq.
"Biz sıfrlyq krıptoaktıvter tólem quraly bolady dep aıtyp jatqanymyz joq. Olar tólem quraly bola almaıdy. Bul arada olardyń bırjadan tys satyp alý-satý múmkindigi qarastyrylady. Osyndaı múmkindik usynylady. Birinshi kezekte, Qazaqstannyń ishki naryǵyna sıfrlyq qarjy aktıvterin engizgen kezde, bul bizdiń qatysýshylarymyzdyń osyndaı aktıvterdi óz betinshe shyǵarýy úshin jasalady. Aıtalyq, debıtorlyq bereshek mindettemeleri aıasynda. Nege debıtorlyq bereshekti satyp, óz bıznesińizdi damytý úshin qosymsha aktıvterdi tartpasqa? Olar ınvestısıalaýda osyndaı qural bolady. Sondyqtan biz QR aýmaǵynda rettelýge jatatyn qarjy aktıvterin shyǵaramyz", - dep sózin túıindedi Berik Sholpanqulov.
Aıta ketsek, 2025 jylǵy 28 qańtarda QR Ulttyq Bankiniń tóraǵasy Tımýr Súleımenov Úkimettiń keńeıtilgen otyrysynda Qazaqstanda sıfrlyq aktıvterdi paıdalaný josparlary týralymen bólisip, sıfrlyq teńge negizinde ózindik steıblkoın qurý pysyqtalyp jatqanyn málimdegen edi.
Búǵan deıin saıtymyzda "1,5 mln qazaqstandyq krıptovalútanyń kóleńkeli naryǵynda júr. Ulttyq bank ne usynady" degen maqala jarıalanǵan bolatyn.
