قازاقستان ۇلتتىق بانكى ءتوراعاسىنىڭ ورىنباسارى بەرىك شولپانقۇلوۆ سەنات دالىزىندە جۋرناليستەرگە بەرگەن سۇقباتىندا كريپتوۆاليۋتالاردىڭ بيرجادان تىس زاڭدى قوزعالىسىنا جول بەرەتىن ستەيبلكوين تۋراسىندا ايتتى، دەپ حابارلايدى Dalanews.kz.
ول بۇل ماسەلە بويىنشا ۇلتتىق بانك رەتتەلەتىن جانە رەتتەلەمەيتىن تەتىكتەرگە يە حالىقارالىق تاجىريبە مەن قۇقىق پراكتيكاسىن زەرتتەگەنىن اتاپ ءوتتى.
"ءبىز يننوۆاسيالاردىڭ قارجى نارىعىنا وتە تەز جانە بەلسەندى تۇردە دەندەپ ەنىپ جاتقانىن كورىپ وتىرمىز. تۇتاستاي العاندا، ءبىرىنشى كوزقاراسىمىز قالىپتاستى، نارىققا قاتىسۋشىلارمەن كەزدەسىپ، كىم قانداي ۇسىنىستار جاساي الادى،سونى بىلدىك،ونىڭ بارىنە رەتتەۋشى كەزەڭ اياسىندا بەيىمدەلەمىز. ەڭ باستىسى، قاڭقاسىن ءتۇزىپ الساق، سودان سوڭ قۇقىقتىق جاعىنا كوشەمىز. زاڭ جوباسىن 2025 جىلدىڭ تامىزىندا تالقىعا ۇسىنباقپىز"، - دەدى بەرىك شولپانقۇلوۆ.
ول قازاقستاندا كريپتوۆاليۋتا نارىعىنىڭ كولەمى بويىنشا ناقتى دەرەكتەر جوق ەكەنىن باسا ايتتى.
"كورشى ەلدەردىڭ تاجىريبەسىنە سۇيەنىپ جاساعان ەسەپتەۋلەر بويىنشا، ءبىر جەردە ميلليارد دوللار، ءبىر جەردە جارتى ميلليون دوللار اينالىم تۋرالى بولجام بار. ەڭ باستىسى، "كولەڭكەلى" نارىقتىڭ بار ەكەنىن بىلەمىز جانە ادامدار ونلاين-سايتتار ارقىلى بەلسەندى تۇردە بيتكويندەر مەن باسقا دا سيفرلىق اكتيۆتەردى ساتىپ الىپ، تۇتىنىپ ءجۇر. جوعارى اتاعان ۇسىنىستاردى ىسكە قوسقان كەزدە ءبىز وسى "كولەڭكەلى" نارىقتى اناعۇرلىم ترانسپارەنتتى ەتۋگە تىرىسامىز جانە بارلىق قاتىسۋشىلار مەن قاراپايىم ازاماتتارعا اكتيۆتەردى الاڭسىز ساتۋعا جانە ساتىپ الۋعا مۇمكىندىك بەرەمىز دەپ سەنەمىز"، – دەپ اتاپ ءوتتى بەرىك شولپانقۇلوۆ.
ونىڭ ايتۋىنشا، بۇل ينۆەستيسيا جاساۋدىڭ تاعى ءبىر قۇرالى بولماق.
"ءبىز سيفرلىق كريپتواكتيۆتەر تولەم قۇرالى بولادى دەپ ايتىپ جاتقانىمىز جوق. ولار تولەم قۇرالى بولا المايدى. بۇل ارادا ولاردىڭ بيرجادان تىس ساتىپ الۋ-ساتۋ مۇمكىندىگى قاراستىرىلادى. وسىنداي مۇمكىندىك ۇسىنىلادى. ءبىرىنشى كەزەكتە، قازاقستاننىڭ ىشكى نارىعىنا سيفرلىق قارجى اكتيۆتەرىن ەنگىزگەن كەزدە، بۇل ءبىزدىڭ قاتىسۋشىلارىمىزدىڭ وسىنداي اكتيۆتەردى ءوز بەتىنشە شىعارۋى ءۇشىن جاسالادى. ايتالىق، دەبيتورلىق بەرەشەك مىندەتتەمەلەرى اياسىندا. نەگە دەبيتورلىق بەرەشەكتى ساتىپ، ءوز بيزنەسىڭىزدى دامىتۋ ءۇشىن قوسىمشا اكتيۆتەردى تارتپاسقا؟ ولار ينۆەستيسيالاۋدا وسىنداي قۇرال بولادى. سوندىقتان ءبىز ق ر اۋماعىندا رەتتەلۋگە جاتاتىن قارجى اكتيۆتەرىن شىعارامىز"، - دەپ ءسوزىن تۇيىندەدى بەرىك شولپانقۇلوۆ.
ايتا كەتسەك، 2025 جىلعى 28 قاڭتاردا ق ر ۇلتتىق بانكىنىڭ ءتوراعاسى تيمۋر سۇلەيمەنوۆ ۇكىمەتتىڭ كەڭەيتىلگەن وتىرىسىندا قازاقستاندا سيفرلىق اكتيۆتەردى پايدالانۋ جوسپارلارى تۋرالىمەن ءبولىسىپ، سيفرلىق تەڭگە نەگىزىندە وزىندىك ستەيبلكوين قۇرۋ پىسىقتالىپ جاتقانىن مالىمدەگەن ەدى.
ءبۇعان دەيىن سايتىمىزدا "1،5 ملن قازاقستاندىق كريپتوۆاليۋتانىڭ كولەڭكەلى نارىعىندا ءجۇر. ۇلتتىق بانك نە ۇسىنادى" دەگەن ماقالا جاريالانعان بولاتىن.
