TikTok áleýmettik jelisinde qazaq tili týraly qorlai sóilegen boijetkenniń videosy jelide qaita tarap, rezonans týdyrdy, dep habarlaidy Dalanews.kz Newtimes.kz basylymyna silteme jasap.
TikTok-ta Aleksandra esimdi qyz qazaq tilin bilmeitinin jáne ony úirenýge nietti emestigin ashyq aitqan. Ol tikelei efir kezinde:
«Men qazaq tilin bilmeimin jáne úirengim kelmeidi. Bul tildi bilýge eshkim mindetti emes, tipti Qazaqstanda tursa da. Maǵan ol qajet emes, men tek orys tilinde sóileimin. Kimge kerek – solar úirensin. Men qazaq tilin kúni boiy otyryp oqýǵa mindetti emespin», – degen.
Qyz óz sózinde ainalasyndaǵy adamdardyń, sonyń ishinde jigitiniń de, tek orys tilinde sóileitinin, sondyqtan qazaq tilin qoldanýǵa qajettilik sezinbeitinin aitqan.
Bul jaǵdai 2023 jyly bolǵanymen, beinejazba tek jaqynda áleýmettik jelilerde qaita tarala bastady. Videony Meiram esimdi qazaqstandyq óz paraqshasynda jariialaǵan. Onyń aitýynsha, videodaǵy qyzdyń esimi – Sasha, ol Kókshetaý qalasynyń týmasy.
Kadrlarda jasóspirim qyz qurbysymen birge tikelei efir ótkizip, qazaq tiline qatysty dóreki jáne ádepsiz pikir aitqany anyq kórinedi.
Politsiia men sot túsinikteme berdi
Bul jaǵdai boiynsha Kókshetaý qalalyq politsiia departamenti pikir bildirgen. Politsiianyń málimetinshe, sol kezde boijetkenge qatysty ákimshilik shara qoldanylǵan.
«Ol kezde kámeletke tolmaǵan, jergilikti kolledj stýdenti bolǵan. Ákimshilik jaýapkershilikke tartylyp, aiyppul salyndy. Qazir ol kámeletke tolǵan jáne oqý ornyn támamdaǵan», – dedi departamenttiń baspasóz hatshysy.
Eske sala ketsek, ulttyq belgi boiynsha qorlaý nemese kemsitý, sonyń ishinde áleýmettik jelilerde jariialanǵan pikirler, Qazaqstan zańnamasyna sáikes qylmystyq jaýapkershilikke de ákelýi múmkin. Mundai is-áreketter Qylmystyq kodekstiń 174-baby – “ultaralyq arazdyqty qozdyrý” retinde qaralady.
