TikTok الەۋمەتتىك جەلىسىندە قازاق ءتىلى تۋرالى قورلاي سويلەگەن بويجەتكەننىڭ ۆيدەوسى جەلىدە قايتا تاراپ، رەزونانس تۋدىردى، دەپ حابارلايدى Dalanews.kz Newtimes.kz باسىلىمىنا سىلتەمە جاساپ.

TikTok-تا الەكساندرا ەسىمدى قىز قازاق ءتىلىن بىلمەيتىنىن جانە ونى ۇيرەنۋگە نيەتتى ەمەستىگىن اشىق ايتقان. ول تىكەلەي ەفير كەزىندە:

«مەن قازاق ءتىلىن بىلمەيمىن جانە ۇيرەنگىم كەلمەيدى. بۇل ءتىلدى بىلۋگە ەشكىم مىندەتتى ەمەس، ءتىپتى قازاقستاندا تۇرسا دا. ماعان ول قاجەت ەمەس، مەن تەك ورىس تىلىندە سويلەيمىن. كىمگە كەرەك – سولار ۇيرەنسىن. مەن قازاق ءتىلىن كۇنى بويى وتىرىپ وقۋعا مىندەتتى ەمەسپىن»، – دەگەن.

قىز ءوز سوزىندە اينالاسىنداعى ادامداردىڭ، سونىڭ ىشىندە جىگىتىنىڭ دە، تەك ورىس تىلىندە سويلەيتىنىن، سوندىقتان قازاق ءتىلىن قولدانۋعا قاجەتتىلىك سەزىنبەيتىنىن ايتقان.

بۇل جاعداي 2023 جىلى بولعانىمەن، بەينەجازبا تەك جاقىندا الەۋمەتتىك جەلىلەردە قايتا تارالا باستادى. ۆيدەونى مەيرام ەسىمدى قازاقستاندىق ءوز پاراقشاسىندا جاريالاعان. ونىڭ ايتۋىنشا، ۆيدەوداعى قىزدىڭ ەسىمى – ساشا،  ول كوكشەتاۋ قالاسىنىڭ تۋماسى.

كادرلاردا ءجاسوسپىرىم قىز قۇربىسىمەن بىرگە تىكەلەي ەفير وتكىزىپ، قازاق تىلىنە قاتىستى دورەكى جانە ادەپسىز پىكىر ايتقانى انىق كورىنەدى.

پوليسيا مەن سوت تۇسىنىكتەمە بەردى

بۇل جاعداي بويىنشا كوكشەتاۋ قالالىق پوليسيا دەپارتامەنتى پىكىر بىلدىرگەن. پوليسيانىڭ مالىمەتىنشە، سول كەزدە بويجەتكەنگە قاتىستى اكىمشىلىك شارا قولدانىلعان.

«ول كەزدە كامەلەتكە تولماعان، جەرگىلىكتى كوللەدج ستۋدەنتى بولعان. اكىمشىلىك جاۋاپكەرشىلىككە تارتىلىپ، ايىپپۇل سالىندى. ءقازىر ول كامەلەتكە تولعان جانە وقۋ ورنىن ءتامامداعان»، – دەدى دەپارتامەنتتىڭ باسپا ءسوز حاتشىسى.

ەسكە سالا كەتسەك، ۇلتتىق بەلگى بويىنشا قورلاۋ نەمەسە كەمسىتۋ، سونىڭ ىشىندە الەۋمەتتىك جەلىلەردە جاريالانعان پىكىرلەر، قازاقستان زاڭناماسىنا سايكەس قىلمىستىق جاۋاپكەرشىلىككە دە اكەلۋى مۇمكىن. مۇنداي ىس-ارەكەتتەر قىلمىستىق كودەكستىڭ 174-بابى – “ۇلتارالىق ارازدىقتى قوزدىرۋ” رەتىندە قارالادى.