Gaiana Úkimeti 18 jastan asqan eldiń árbir azamatyna 100 myń Gaiana dollaryn (shamamen 480 AQSh dollary) tóleý týraly sheshim qabyldady. Osylaisha kirisin halqymen bólispek munai shikizaty bul eldiń ekonomikasynyń jyldam ári qarqyndy damýyna serpin berip otyr, dep habarlaidy Dalanews.kz.
Aýmaqtyq sýlarda iri munai ken oryny ashylǵanǵa deiin Gaiana Ońtústik Amerikadaǵy eń kedei memleketterdiń biri bolyp kelgen. Endi, Halyqaralyq valiýta qorynyń (HVQ) 2024 jylǵy málimetteri boiynsha, onyń jan basyna shaqqandaǵy JIÓ kólemi 29 000 dollarǵa jaqyndap qaldy, bul Resei men Qazaqstannan (14 000) da eki ese artyq kólem. Ekonomikalyq ósimi boiynsha Gaiana qazir Litva men Portýgaliia arasyna ornyqqan. Gaiana elinde 800 myńǵa jýyq adam turady, al taǵy 400 azamaty basqa elderde turyp, jumys isteidi. Syrtta júrgenderine de tólem beriledi, dep jazady The Guardian
Sarapshylardyń baǵalaýynsha, tólem jasaý baǵanyń belgili bir ósimine qaramastan ekonomika úshin tiimdi bolmaq. Alaida, oppozitsiia el azamattarynyń eksporttan túsetin tabystan úles alýyn turaqty etýdi talap etýde. Ońtústik Amerika eliniń óndiris kólemin arttyrýy OPEK+tiń munai baǵasyn ustap turý jónindegi sharalary tiimdiliginiń tómendeýine qatysty sebepterdiń biri retinde atalady. AQSh, Braziliia jáne basqa da birqatar eldermen birge Gaiana álemdik naryqqa munai tasymalyn arttyrdy. Sóitip olar kartelge múshe elderdiń munai óndirisin qysqartýda álemdik naryqta paida bolǵan úńireigen bos oryndy tiimdi paidalanýda.
Buǵan deiin BJZQ "Ulttyq qor – balalarǵa" baǵdarlamasy qatysýshylaryna 3,4 mln dollar aýdarǵanyn jazǵan bolatynbyz. Qazaqstanda shikizattan túsken tabys 2024 jyly qańtarda balalarǵa berile bastady. Ol úshin BJZQ-dan shottar ashylyp, ár balaǵa 100,52 dollardan aýdaryldy. Balanyń nysanaly talaptarǵa qatysýshylar tizimine qosylǵany týraly aqparatty ata-analar nemese basqa da zańdy ókilder kids.enpf.kz saity arqyly balanyń JSN nómiri boiynsha teksere alady.
