گايانا ۇكىمەتى 18 جاستان اسقان ەلدىڭ ءاربىر ازاماتىنا 100 مىڭ گايانا دوللارىن (شامامەن 480 اقش دوللارى) تولەۋ تۋرالى شەشىم قابىلدادى. وسىلايشا كىرىسىن حالقىمەن بولىسپەك مۇناي شيكىزاتى بۇل ەلدىڭ ەكونوميكاسىنىڭ جىلدام ءارى قارقىندى دامۋىنا سەرپىن بەرىپ وتىر، دەپ حابارلايدى Dalanews.kz.
اۋماقتىق سۋلاردا ءىرى مۇناي كەن ورىنى اشىلعانعا دەيىن گايانا وڭتۇستىك امەريكاداعى ەڭ كەدەي مەملەكەتتەردىڭ ءبىرى بولىپ كەلگەن. ەندى، حالىقارالىق ۆاليۋتا قورىنىڭ (حۆق) 2024 جىلعى مالىمەتتەرى بويىنشا، ونىڭ جان باسىنا شاققانداعى ءجىو كولەمى 29 000 دوللارعا جاقىنداپ قالدى، بۇل رەسەي مەن قازاقستاننان (14 000) دا ەكى ەسە ارتىق كولەم. ەكونوميكالىق ءوسىمى بويىنشا گايانا ءقازىر ليتۆا مەن پورتۋگاليا اراسىنا ورنىققان. گايانا ەلىندە 800 مىڭعا جۋىق ادام تۇرادى، ال تاعى 400 ازاماتى باسقا ەلدەردە تۇرىپ، جۇمىس ىستەيدى. سىرتتا جۇرگەندەرىنە دە تولەم بەرىلەدى، دەپ جازادى The Guardian
ساراپشىلاردىڭ باعالاۋىنشا، تولەم جاساۋ باعانىڭ بەلگىلى ءبىر وسىمىنە قاراماستان ەكونوميكا ءۇشىن ءتيىمدى بولماق. الايدا، وپپوزيسيا ەل ازاماتتارىنىڭ ەكسپورتتان تۇسەتىن تابىستان ۇلەس الۋىن تۇراقتى ەتۋدى تالاپ ەتۋدە. وڭتۇستىك امەريكا ەلىنىڭ ءوندىرىس كولەمىن ارتتىرۋى وپەك+ءتىڭ مۇناي باعاسىن ۇستاپ تۇرۋ جونىندەگى شارالارى تيىمدىلىگىنىڭ تومەندەۋىنە قاتىستى سەبەپتەردىڭ ءبىرى رەتىندە اتالادى. اقش، برازيليا جانە باسقا دا ءبىرقاتار ەلدەرمەن بىرگە گايانا الەمدىك نارىققا مۇناي تاسىمالىن ارتتىردى. ءسويتىپ ولار كارتەلگە مۇشە ەلدەردىڭ مۇناي ءوندىرىسىن قىسقارتۋدا الەمدىك نارىقتا پايدا بولعان ۇڭىرەيگەن بوس ورىندى ءتيىمدى پايدالانۋدا.
بۇعان دەيىن بجزق "ۇلتتىق قور – بالالارعا" باعدارلاماسى قاتىسۋشىلارىنا 3،4 ملن دوللار اۋدارعانىن جازعان بولاتىنبىز. قازاقستاندا شيكىزاتتان تۇسكەن تابىس 2024 جىلى قاڭتاردا بالالارعا بەرىلە باستادى. ول ءۇشىن بجزق-دان شوتتار اشىلىپ، ءار بالاعا 100،52 دوللاردان اۋدارىلدى. بالانىڭ نىسانالى تالاپتارعا قاتىسۋشىلار تىزىمىنە قوسىلعانى تۋرالى اقپاراتتى اتا-انالار نەمەسە باسقا دا زاڭدى وكىلدەر kids.enpf.kz سايتى ارقىلى بالانىڭ جسن ءنومىرى بويىنشا تەكسەرە الادى.
