Kazakhmys Distribution Keńgir sý qoimasynyń gidrotehnikalyq qurylymdaryn memleketke qaitardy. Qoldan qolǵa ótkizip berý protsesi syiǵa tartý shartymen tirkeldi, dep jazady Dalanews.kz.
Múlikti qaitarý úshin oblys prokýratýrasy Sý resýrstary ministriniń atyna usynys engizdi.
"Prokýrorlyq qadaǵalaý aktisin oryndaý maqsatynda syiǵa tartý sharty jasalyp, obektini berý aktisine qol qoiyldy. Endi ýákiletti organdar olardy jańǵyrtý jóninde odan ári sharalar qabyldaý maqsatynda sý qoimasy men onyń gidrotehnikalyq qurylystaryna kóp faktorly zertteý jumystaryn júrgizý qajet", delingen Ulytaý oblysy prokýratýrasynyń 2025 jylǵy 21 aqpandaǵy habarlamasynda.
Ulytaý oblysynyń igilikteriniń biri, sondai-aq energetika jáne irrigatsiia salasynda sýdyń basty retteýshisi Keńgir sý qoimasy bolyp tabylady.
Sý qoimasy 1952 jyly salynǵan (jalpy kólemi - 319 million sharshy metr) jáne onyń gidrotehnikalyq qurylystary strategiialyq obektiler katarynda, demek memleket menshiginde bolýy tiis. Óz kezinde bul obektiler qala quraýshy kásiporyn "Kazakhmys Distribution" JShS balansyna berilgen.
Bul nysannyń memleket qaramaǵanyna ótkeli jatqanyn Sý resýrstary jáne irrigatsiia ministri Nurjan Nurjigitov 2024 jyldyń kúzinde aitqan bolatyn.
"Keńgir sý qoimasy aimaqtaǵy sýdyń negizgi kózi bolyp tabylady. Jergilikti turǵyndar sýdyń sapasyna, onyń tiimsiz paidalanylýyna jáne ekologiialyq máselelerge alańdaýshylyq bildirip otyr. Nysandaǵy gidrotehnikalyq qurylystar apatty jaǵdaida. Sý qoimasyn memleket menshigine qaitarǵannan keiin biz qordalanǵan máselelerdi sheshý úshin eń aldymen kóp faktorly zertteý júrgizemiz", – dedi ministr ol kezde.
