2024 jyldyń kókteminde Qazaqstannyń batysy men soltústiginde bolǵan joiqyn sý tasqyny kezinde Kaspi Bank zardap shekkenderge kómek retinde “Biz Birgemiz Qazaqstan 2030” qoǵamdyq qoryna 620 million teńge aýdarǵan. Alaida tergeý málimetterine sáikes, bul qarjyny qor basshysy Perizat Qairat jeke paidasy úshin iemdengeni belgili boldy, dep habarlaidy Dalanews.kz.
Kaspi Bank-tiń zańgeri Aidar Kisenbaevtiń aitýynsha, 2024 jyldyń 5 sáýirinde qor basshysy bankke 120 mln teńge bólý týraly resmi hat joldaǵan. Al 8 sáýirde ekinshi hat túsip, qosymsha 500 mln teńge suralǵan. Bank barlyǵy 620 mln teńgeni “Forte Bank” AQ-taǵy qordyń shotyna aýdarǵan.
1 shildede “Biz Birgemiz Qazaqstan 2030” qory Kaspi Bank-ke alǵys hatyn joldap, 30 maýsymǵa deiingi qarjy esebin qosa usynǵan. Qujatta kórsetilgendei, 424 146 296 teńge qaiyqtar, generatorlar men jórgekter satyp alýǵa jumsalǵan. Qalǵan qarajat azyq-túlik pen basqa da qajettilikterge bólindi delingen. Alaida keiin anyqtalǵandai, bul esep shyndyqqa janaspaityn bolyp shyqty.
“Qazirgi tańda bul qarajattyń uiym basshysy tarapynan jymqyrylǵany belgili boldy. Nátijesinde Kaspi Bank-ke 620 million teńge kóleminde zalal keldi”, – dedi Kisenbaev.
Zańger banktiń ne sebepti dál osy qorǵa senim artqanyna da toqtaldy.
“Ol kezde Jusan Bank 300 mln teńge aýdarǵany týraly aqparat taraǵan. Biz de osy úlgini negizge aldyq”, – dedi ol.
Qazirgi tańda Kaspi Bank atalǵan qarajatty qaitarý úshin sotqa júginýge nietti.
Aita keteiik, buǵan deiin Jusan Bank Perizat Qairattyń qoryn teksermesten 300 mln teńge aýdarǵany týraly jazǵan edik.
Perizat Qairatqa qatysty úsh epizodtyń birinde ol sý tasqynynan zardap shekkenderge kómek kórsetý úshin shamamen 2,9 mlrd teńge jinap, onyń tek 920 mln teńgesin ǵana maqsatty túrde jumsady dep aiyp taǵyldy.
Osy naýqan aiasynda First Heartland Jusan Bank (qazirgi ataýy Alatau City Bank) 300 mln teńge kóleminde qaiyrymdylyq kómek kórsetken. Banktiń ókili Beibit Jorabaevtyń aitýynsha, olarǵa BizBirgemiz Qazaqstan 2030 qorynan Perizat Qairattyń qoly qoiylǵan hat kelgen. Onda qaiyrymdylyq kómek suralǵan. Bul másele banktiń basqarma otyrysynda qaralyp, qarajat qaiyrymdylyq retinde aýdarylǵan.
Alaida Perizat Qairat bul bastamanyń banktiń ózinen shyqqanyn aitady. Osyǵan bailanysty ol sottan PR qyzmetiniń ókili Mihail Egormen bettesýge múmkindik berýdi surady. Aitýynsha, dál sol adammen kelissóz júrgizgen.
Bank bul iske jábirlenýshi tarap retinde tanylǵan. Onyń atynan sotta Jorabaev kýálik berdi.
Qorǵaýshy Aslanbek Davletiarov sot otyrysynda bankten: nelikten dál sol 300 mln teńge urlandy dep senimdi aitasyzdar, bálkim ol qarajat shyn máninde zardap shekkenderge jumsalǵan shyǵar? – dep surady. Onyń sózinshe, Qairat 2024 jyldyń 2 sáýiri men 18 shildesi aralyǵynda 1 mlrd teńgeden astam qarjyny motorly jáne úrmeli qaiyqtarǵa, generatorlarǵa, kiiz úilerge, azyq-túlik pen tehnikalarǵa jumsaǵan.
"Biz tergeý materialdarymen tanystyq, tergeý zań aiasynda júrgizilgenine kóz jetkizdik. Tergeýshi usynǵan barlyq qujattardy oqydyq. Biraq naqty bizdiń qarajat qaida jumsalǵanyn zerttegen joqpyn, sondyqtan bul suraqqa naqty jaýap bere almaimyn", – dedi Jorabaev.
Sondai-aq qorǵaýshy bankten: nelikten iri qarjy uiymy 1–2 mln teńgeni de muqiiat tekserip baryp aýdaratynyna qaramastan, Qairattyń bir ǵana hatyna senip, 300 mln teńgeni aýdardy? – dep suraq qoidy. Jorabaev bul sheshim banktiń basqarma deńgeiinde qabyldanǵanyn aitty. Onyń sózinshe, sol kezde sý tasqynynan tipti banktiń keibir bólimsheleri de zardap shekken, sondyqtan olar kómek berýge niet bildirgen.
