Qazaqstanda bank shoty ártúrli sebepterge bailanysty buǵattalýy múmkin. Bul týraly Qarjy naryǵyn retteý jáne damytý agenttigi málimdedi, dep habarlaidy Dalanews.kz.
Agenttik málimetinshe, shottyń buǵattalýyna tehnikalyq aqaýlardan bastap, zań talaptarynyń buzylýyna qatysty kúmánge deiin túrli faktorlar áser etýi múmkin.
Shot ne sebepti buǵattalady?
Eń jii kezdesetin sebepter mynalar:
– kúmándi nemese ádetten tys operatsiialar (iri nemese jii aýdarymdar, ásirese shetelden túsetin qarajat);
– memlekettik organdardyń suranysy (salyq qyzmeti, sot oryndaýshylary, qarjylyq monitoring organdary);
– bank júiesindegi tehnikalyq aqaýlar;
– PIN-kodtyń birneshe ret qate engizilýi nemese kartanyń merziminiń aiaqtalýy.
Shot buǵattalsa ne isteý kerek?
Eger shotyńyzǵa qoljetimdilik shektelse, eń aldymen bank qosymshasyndaǵy habarlamalardy tekserý qajet. Kóp jaǵdaida buǵattaýdyń sebebi sol jerde kórsetiledi.
Sondai-aq:
– banktiń bailanys ortalyǵyna habarlasý nemese bólimshesine barý;
– shotty qalpyna keltirý úshin qandai áreketter qajet ekenin naqtylaý;
– eGov.kz portaly nemese salyq tóleýshiniń jeke kabineti arqyly bereshekterdiń bar-joǵyn tekserý usynylady.
Qajet bolǵan jaǵdaida qarajattyń qaidan túskenin rastaityn qujattardy daiyndaý kerek.
Buǵattalý qaýpin qalai azaitýǵa bolady?
Agenttik mundai jaǵdaidyń aldyn alý úshin kelesi keńesterdi usynady:
– jeke shotty kásipkerlik maqsatta paidalanbaý;
– iri nemese ádetten tys aýdarymdar týraly bankke aldyn ala habarlaý;
– jeke derekterdiń ózektiligin qadaǵalaý;
– qaryzdardy ýaqytynda óteý.
Agenttik ókilderi qarjylyq operatsiialardy ashyq ári zań talaptaryna sai júrgizý shottyń buǵattalý qaýpin azaitatynyn atap ótti.
