قازاقستاندا بانك شوتى ءارتۇرلى سەبەپتەرگە بايلانىستى بۇعاتتالۋى مۇمكىن. بۇل تۋرالى قارجى نارىعىن رەتتەۋ جانە دامىتۋ اگەنتتىگى مالىمدەدى، دەپ حابارلايدى Dalanews.kz.

اگەنتتىك مالىمەتىنشە، شوتتىڭ بۇعاتتالۋىنا تەحنيكالىق اقاۋلاردان باستاپ، زاڭ تالاپتارىنىڭ بۇزىلۋىنا قاتىستى كۇمانگە دەيىن ءتۇرلى فاكتورلار اسەر ەتۋى مۇمكىن.

شوت نە سەبەپتى بۇعاتتالادى؟

ەڭ ءجيى كەزدەسەتىن سەبەپتەر مىنالار:

– كۇماندى نەمەسە ادەتتەن تىس وپەراسيالار (ءىرى نەمەسە ءجيى اۋدارىمدار، اسىرەسە شەتەلدەن تۇسەتىن قاراجات)؛
– مەملەكەتتىك ورگانداردىڭ سۇرانىسى (سالىق قىزمەتى، سوت ورىنداۋشىلارى، قارجىلىق مونيتورينگ ورگاندارى)؛
– بانك جۇيەسىندەگى تەحنيكالىق اقاۋلار؛
– پين-كودتىڭ بىرنەشە رەت قاتە ەنگىزىلۋى نەمەسە كارتانىڭ مەرزىمىنىڭ اياقتالۋى.

شوت بۇعاتتالسا نە ىستەۋ كەرەك؟

ەگەر شوتىڭىزعا قولجەتىمدىلىك شەكتەلسە، ەڭ الدىمەن بانك قوسىمشاسىنداعى حابارلامالاردى تەكسەرۋ قاجەت. كوپ جاعدايدا بۇعاتتاۋدىڭ سەبەبى سول جەردە كورسەتىلەدى.

سونداي-اق:

– بانكتىڭ بايلانىس ورتالىعىنا حابارلاسۋ نەمەسە بولىمشەسىنە بارۋ؛
– شوتتى قالپىنا كەلتىرۋ ءۇشىن قانداي ارەكەتتەر قاجەت ەكەنىن ناقتىلاۋ؛
– eGov.kz پورتالى نەمەسە سالىق تولەۋشىنىڭ جەكە كابينەتى ارقىلى بەرەشەكتەردىڭ بار-جوعىن تەكسەرۋ ۇسىنىلادى.

قاجەت بولعان جاعدايدا قاراجاتتىڭ قايدان تۇسكەنىن راستايتىن قۇجاتتاردى دايىنداۋ كەرەك.

بۇعاتتالۋ ءقاۋپىن قالاي ازايتۋعا بولادى؟

اگەنتتىك مۇنداي جاعدايدىڭ الدىن الۋ ءۇشىن كەلەسى كەڭەستەردى ۇسىنادى:

– جەكە شوتتى كاسىپكەرلىك ماقساتتا پايدالانباۋ؛
– ءىرى نەمەسە ادەتتەن تىس اۋدارىمدار تۋرالى بانككە الدىن الا حابارلاۋ؛
– جەكە دەرەكتەردىڭ وزەكتىلىگىن قاداعالاۋ؛
– قارىزداردى ۋاقىتىندا وتەۋ.

اگەنتتىك وكىلدەرى قارجىلىق وپەراسيالاردى اشىق ءارى زاڭ تالاپتارىنا ساي جۇرگىزۋ شوتتىڭ بۇعاتتالۋ ءقاۋپىن ازايتاتىنىن اتاپ ءوتتى.