Qazaqstannyń bank júiesinde paradoksaldy, biraq mańyzdy signal qalyptasty. Aqsha aǵyny jumsalýdan kóri jinaqtalýǵa bet alǵan, - dep habarlaidy DALA INSIDE.
Biylǵy sáýir aiynda ekinshi deńgeili bankterdegi depozitterdiń jalpy kólemi shamamen 47,2 trln teńgege jetti, al kredit portfeli 42,6 trln teńgeni qurady. Iaǵni, bankterdegi jinalǵan aqsha berilgen nesieden aitarlyqtai kóp.
Bul ósimniń negizgi kózi qarapaiym halyq bolyp otyr. Jeke tulǵalardyń depozitteri turaqty túrde kóbeiip, 2026 jyldyń basynda 17,4 trln teńgege jetti. Al 2025 jyldyń qorytyndysy boiynsha olar bir jylda 15,8%-ǵa ósip, 26,2 trln teńgeni quraǵan edi.
Al biznes depozitteri kerisinshe birkelki emes dinamika kórsetip otyr. Jyl basynda olar azaiyp, qazir shamamen 13,9 trln teńge deńgeiinde turaqtandy. Bul biznestiń aqshany bankte ustap otyrmaǵanyn nemese ainalymǵa jiberip jatqanyn bildiredi.
Eń basty trend - halyqqa kredit berý qarqyny qatty baiaýlady. Mysaly, 2026 jyldyń aqpan aiynda jalpy kredit portfeliniń ósimi nebári 0,4% boldy. Al halyqqa kepilsiz nesie berý keminde 10 paiyzǵa tómendedi.
Kredit berý azaiǵandyqtan, sońǵy ailarda bankterdiń Qazaqstan Ulttyq Banki quraldaryna aqsha salýy kúrt ósti. Qysqa merzimdi, kepilmen qamtamasyz etilgen operatsiialar (REPO) arqyly tabys tabý belsendiligi artyp keledi.
Bizneske kredit baiaý berilgen saiyn jańa jobalar da baiaý iske asady, investitsiia azaiady, jalpy ekonomikalyq ainalym tejeledi. Qarapaiym tilmen aitsaq, qazir Qazaqstanda aqsha bar, biraq ol tolyq ainalymǵa túspei otyr. Bankter táýekelden qashyp, qorǵanys rejimine kóshken. Bul qysqa merzimde turaqtylyqty saqtaýy múmkin. Biraq arty jaqsylyqqa aparmaidy.
