Saiasatker, memleket qairatkeri Amalbek Tshanov jaqynda Májilis tóraǵasyn maqtaimyn dep sóz estip qalǵan depýtat Jigýli Dairabaevtyń áreketine qatysty pikir bildirdi, dep habarlaidy Dalanews.kz.
"Olai depýtat bolyp otyrǵansha jerge kirip ketý kerek qoi. Depýtattyń jumysy birin-biri maqtaý ma? Qazir Májilis tóraǵasy bolyp otyrǵan jigitti de jaqsy bilemiz. Biz depýtat bolyp júrgende úkimettiń ókili bolyp júretin azamat edi. Aspannan salbyrap... degendei eshqandai artyqshylyǵy joq. Ol da siz ben biz siiaqty adam. Qyzmette otyr eken dep kiretin jerin izdep júrý eshqandai etiketke jatpaidy", - deidi Amalbek Tshanov Sadaq media Youtube arnasyna bergen suhbatynda.
Tshan sonymen qatar eks-prezident Nursultan Nazarbaevtyń dáýirindegi oǵashtaý, ersizdeý maqtaýlardy da eske aldy.
"Nazarbaev otyrǵan kezde ne aitylmady?! "Bizge Kúnniń keregi joq..." dedi ǵoi. Bárin qabyldady. Myrzatai kókemiz de (Myrzatai Joldasbekov, red.) "500 jylda túk istemegen elmiz, siz kelgen soń bárimiz aspanǵa ushyp jatyrmyz" dedi. Ony aitpasa da istegen isiń elge, halyqqa qalady ǵoi. Ony eldiń ózi-aq aitady erteń. Kózinshe badyraityp maqtaý qazaqtyń túbine jetetin nárse. 4-5 jyl merzim berildi me, odan artyq eshkimdi ustaýǵa bolmaidy. Kezektessin, jańaryp otyrsyn", - deidi saiasatker.
Eske salaiyq, 17 qańtarda májilis depýtaty Jigýli Dairabaev Májilis tóraǵasy Erlan Qoshanovty orynsyz kóp maqtaimyn dep sóz estip qalǵan bolatyn.
"Prezidenttiń depýtattardyń jumysyna joǵary baǵa bergeni – qurmetti Erlan Jaqanuly, sizdiń múltiksiz bedelińizdiń arqasy ekeni sózsiz. Sol úshin sizge alǵysymyzdy bildiremiz. Prezidentimizdiń suhbatynda bergen aqparat, elimizdiń keleshektegi damýyna qatysty baǵyt-baǵdarlar, óńirlerde halyqpen syndarly kezdesýge úlken múmkindik týǵyzdy. Ózderińiz biletindei, men aqty aq qarany qara dep aitatyn azamatpyn. Qandai-da bir jaǵympazdaný maqsatynda maqtaý aitý — meniń tabiǵatyma jat nárse. Halqymyz jaqsynyń jaqsylyǵyn ait, nury tasysyn degen…", — degen depýtattyń sózin Májilis tóraǵasy Erlan Qoshanov bólgen.
"Saýalyńyzdy joldasańyzshy, bet albaty maqtamai", — degen bolatyn Májilis tóraǵasy.
