"Qazaqtelekom" aksıonerleri quramynda ózgeris boldy. Qazaqstan qor bırjasy saıtynda jarıalanǵan málimetke sáıkes, 2025 jyly 1 qańtarda teleoperator kapıtalynyń 8,1% úlesine ıe Jusan Bank onyń quramynan shyqty. Týra osy úlespen kompanıa quramyna Telecom Systems Ltd endi, dep jazady Dalanews.kz.

Banktiń "Qazaqtelekom" aksıalaryn Artyqbaevtyń kompanıasyna qanshaǵa satqany belgisiz.

Iá, ashyq derek kózdegi málimetter boıynsha, Telecom Systems 2024 jyly maýsymda tirkelgen, quryltaıshysy kásipker Nurlan Artyqbaev bolap tabylady.  Al oǵan Qazaq Stroy qurylys kompanıasy, Qazaq Kalium Ltd kásiporny tıesili.

"First Heartland Jusan Bank" AQ-tyń qolyna telekom-operatordyń 8,1% aksıasy 2023 jyly qyrkúıekte tıgen bolatyn. Al buǵan deıin "Qazaqtelekom" aksıonerleri – "Samuryq-Qazyna" ulttyq ál-aýqat qory (45.90%),  QR QM Memlekettik múlik jáne jekeshelendirý komıeti (25,42%) jáne The Bank of New York Mellon DRS (8,62%) bolǵan.

Al dál qazirgi ýaqytta, 2025 jylǵy 1 qańtardaǵy KASE derekteri boıynsha, "Samuryq-Qazyna" qoryna "Qazaqtelekom" aksıalarynyń 80,85%-y, Telecom Systems Ltd jekemenshik kompanıasyny 8,1%-y tıesili.

Buǵan deıin Aleksandr Babıchev "Mobaıl Telekom-Servıs" JSHS (Tele2/Altel uıaly operatory) basqarmasynyń tóraǵasy bolyp taǵaıyndalǵanyn, ol  Sergeı Nazarenkonyń ornyn basqanyn jazǵanbyz.