Jobany Qoja Ahmet Iasaýi atyndaǵy Halyqaralyq qazaq-túrik ýniversitetine qarasty Eýraziia ǵylymi-zertteý institýty uiymdastyrdy. Túrik tilin úirený sabaqtarynyń saltanatty bastalýy Qazaqstan Respýblikasy kúnine jáne Túrkiia respýblikasynyń 100 jyldyǵyna orailastyrylǵan.
Is-sharanyń ashylý saltanatyna Túrkiia Respýblikasynyń Almaty qalasyndaǵy bas konsýly Eýren Múderrisoǵlý, Q.A. Iasaýi atyndaǵy Halyqaralyq qazaq-túrik ýniversitetiniń Ókiletti keńes tóraǵasy, professor, doktor Muhittin Shimshek, «Alatau Aqparat» mediaholdinginiń Bas direktory Erjan Qalymbaiuly, Eýraziialyq ǵylymi-zertteý institýtynyń direktory, doktor Sýat Beiliýr, QR Ortalyq memlekettik arhiviniń direktory, tarih ǵylymdarynyń kandidaty S.Q. Shildebai, sondai-aq BAQ ókilderi men mýzei qyzmetkerleri qatysty.
Túrkiia Respýblikasynyń Almaty qalasyndaǵy bas konsýly Eýren Múderrisoǵlý qatysýshylardy ulttyq mereke – Respýblika kúnimen quttyqtai kele:
- Túrkiia Qazaqstannyń táýelsizdigin alǵash bolyp moiyndaǵan memleket. Sodan beri memleketterimizdiń baýyrlastyq bailanystary nyǵaiyp keledi. Búgin túbi bir týys elder arasynda taǵy bir mańyzdy qadam jasaldy. Sebebi, til – halyqtardy jaqyndastyrady, jaqyn tanyp, tereń túsinýge jol ashady, - dedi.
Eýraziialyq ǵylymi-zertteý institýtynyń direktory Sýat Beilúr túrik tilin Túrkiiadan Almatyǵa arnaiy kelgen oqytýshylar úiretetinin atap ótti. Onyń sózinshe, kýrsty «Alatau Aqparat» mediaholdinginiń 20 qyzmetkeri, sondai-aq QR Ortalyq memlekettik arhiviniń qyzmetkerleri oqidy.
Óz kezeginde «Alatau Aqparat» mediaholdinginiń Bas direktory Erjan Qalymbaiuly túrik tilin úirený — 200 milliondai halqy bar Túrki Áleminiń qaqpasyn ashýǵa jaqsy múmkindik ekenin aitty. Joba nátijesinde jýrnalister Túrkiia jáne túrkitildes elderdiń jetekshi BAQ-tarynda taǵylymdamadan ótip, atalǵan elderde ary qarai bilimderin jetildire alady.
Aita keteiik, mamyr aiynda «Alatau Aqparat» mediaholdingi men Eýraziialyq ǵylymi-zertteý institýty arasynda yntymaqtastyq týraly memorandýmǵa qol qoiylǵan bolatyn.
Jýrnalisterdiń til oqýy atalǵan áriptestik qujaty sheńberinde júzege asyryldy. Túrik tiliniń tolyq kýrsy 6 deńgeiden turady. Bir deńgei 80 akademiialyq saǵatqa eseptelgen. Kýrs aiaqtalǵannan keiin qatysýshylarǵa Qoja Ahmet Iassaýi atyndaǵy Halyqaralyq qazaq-túrik ýniversiteti lingvistikalyq ortalyǵynyń arnaiy sertifikattary beriledi.
