2024 jyly Qazaqstan sońǵy toǵyz jylda alǵash ret oń kóshi-qon saldosyna qol jetkizdi: elge 29 282 adam kelse, 12 732 adam ketken. Aiyrmashylyq +16 550 adamdy qurap, ótken jylmen salystyrǵanda 15,3%-ǵa artty. Alaida bul statistikanyń astarynda qarama-qaishy úrdister baiqalady, dep habarlaidy Dalanews.kz.
Kimder kelip, kimder ketýde?
Kóshi-qon aǵyny negizinen TMD elderinen qalyptasady. EconomyKZ sarapshylarynyń málimetinshe, Qazaqstanǵa kóship kelgenderdiń 81,6%-y – osy elderden, al ketkenderdiń 74,8%-y da TMD aýmaǵyn tańdaǵan.
Elge qonys aýdarǵandardyń arasynda etnikalyq qazaqtar (50,6%), orystar (19,8%) jáne ózbekter (5,7%) basym. Al Qazaqstannan ketip jatqandardyń arasynda orystar (61,9%), nemister (13,9%) jáne qazaqtar (6,2%) kóp.
“Bul jaǵdai el úshin aitarlyqtai alańdaýshylyq týdyrady: Qazaqstan kóbine biliktiligi tómen jumys kúshin qabyldap, kerisinshe, joǵary bilimdi, bilikti mamandarynan aiyrylyp jatyr”, — deidi EconomyKZ saapshylary.
Megapolister men óńirler arasyndaǵy alshaqtyq
Taǵy bir mańyzdy úrdis – ishki kóshi-qonnyń 47,6%-ǵa ósýi. Adamdardyń negizgi aǵyny Astana (+73 238 adam), Almaty (+36 061 adam) jáne Shymkentke (+9 361 adam) baǵyttalǵan. Al shaǵyn qalalar men aýyldyq aimaqtardan qarqyndy túrde halyq qonys aýdaryp jatyp. Bul eldiń teńgerimdi damýyna keri áser etýde.
Resmi statistika boiynsha Qazaqstannyń halqy kóbeiip jatqanymen, onyń qurylymy alańdatarlyq suraqtar týyndatady. Bilikti kadrlardyń shetelge ketýi jáne halyqtyń tek iri qalalarda shoǵyrlanýy uzaq merzimdi ekonomikalyq ári áleýmettik turaqtylyqqa syn-qater tóndirýi múmkin.
