2024 جىلى قازاقستان سوڭعى توعىز جىلدا العاش رەت وڭ كوشى-قون سالدوسىنا قول جەتكىزدى: ەلگە 29 282 ادام كەلسە، 12 732 ادام كەتكەن. ايىرماشىلىق +16 550 ادامدى قۇراپ، وتكەن جىلمەن سالىستىرعاندا 15،3%-عا ارتتى. الايدا بۇل ستاتيستيكانىڭ استارىندا قاراما-قايشى ۇردىستەر بايقالادى، دەپ حابارلايدى Dalanews.kz.
كىمدەر كەلىپ، كىمدەر كەتۋدە؟
كوشى-قون اعىنى نەگىزىنەن تمد ەلدەرىنەن قالىپتاسادى. EconomyKZ ساراپشىلارىنىڭ مالىمەتىنشە، قازاقستانعا كوشىپ كەلگەندەردىڭ 81،6%-ى – وسى ەلدەردەن، ال كەتكەندەردىڭ 74،8%-ى دا تمد اۋماعىن تاڭداعان.
ەلگە قونىس اۋدارعانداردىڭ اراسىندا ەتنيكالىق قازاقتار (50،6%)، ورىستار (19،8%) جانە وزبەكتەر (5،7%) باسىم. ال قازاقستاننان كەتىپ جاتقانداردىڭ اراسىندا ورىستار (61،9%)، نەمىستەر (13،9%) جانە قازاقتار (6،2%) كوپ.
“بۇل جاعداي ەل ءۇشىن ايتارلىقتاي الاڭداۋشىلىق تۋدىرادى: قازاقستان كوبىنە بىلىكتىلىگى تومەن جۇمىس كۇشىن قابىلداپ، كەرىسىنشە، جوعارى ءبىلىمدى، بىلىكتى ماماندارىنان ايىرىلىپ جاتىر”، — دەيدى EconomyKZ سااپشىلارى.
مەگاپوليستەر مەن وڭىرلەر اراسىنداعى الشاقتىق
تاعى ءبىر ماڭىزدى ءۇردىس – ىشكى كوشى-قوننىڭ 47،6%-عا ءوسۋى. ادامداردىڭ نەگىزگى اعىنى استانا (+73 238 ادام)، الماتى (+36 061 ادام) جانە شىمكەنتكە (+9 361 ادام) باعىتتالعان. ال شاعىن قالالار مەن اۋىلدىق ايماقتاردان قارقىندى تۇردە حالىق قونىس اۋدارىپ جاتىپ. بۇل ەلدىڭ تەڭگەرىمدى دامۋىنا كەرى اسەر ەتۋدە.
رەسمي ستاتيستيكا بويىنشا قازاقستاننىڭ حالقى كوبەيىپ جاتقانىمەن، ونىڭ قۇرىلىمى الاڭداتارلىق سۇراقتار تۋىنداتادى. بىلىكتى كادرلاردىڭ شەتەلگە كەتۋى جانە حالىقتىڭ تەك ءىرى قالالاردا شوعىرلانۋى ۇزاق مەرزىمدى ەكونوميكالىق ءارى الەۋمەتتىك تۇراقتىلىققا سىن-قاتەر ءتوندىرۋى مۇمكىن.
