Bıylǵy jyly taǵy 13 eldi mekendi gazǵa qosý arqyly turǵyndardyń kógildir otynǵa qoljetimdiligi 61 prosentke jetedi. Bul týraly búgin Nur-Sultan qalasynda QR Prezıdenti janyndaǵy OKQ alańynda ótken brıfıń kezinde Almaty oblysynyń ákimi Amandyq Batalov aıtty, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.

– Atmosferadaǵy shyǵaryndylar deńgeıin azaıtý úshin eldi mekenderdi gazdandyrý jáne jylý kózderin gazben jylytýǵa aýystyrý jumystary jalǵasyp jatyr. Ótken jyly biz oblys halqynyń 59%-iniń, ıaǵnı 1,2 mln adamnyń gazǵa qol jetkizýin qamtamasyz ettik. Bıyl taǵy 13 eldi mekendi qosý arqyly bul kórsetkishti 61 prosentke jetkizemiz, – dedi óz sózinde Amandyq Batalov.

Spıkerdiń aıtýynsha, ótken jyly Taldyqorǵan jáne Qapshaǵaı qalalarynda úsh qazandyq gazǵa aýystyrylǵan, bıyl Taldyqorǵan qalasy men Eskeldi aýdanynda taǵy úsheýi aýystyrylyp jatyr. Memlekettik-jekemenshik áriptestik aıasynda 101 kóppáterli turǵyn úı úshin 31 blokty-modýldi qazandyqtar ornatylýda, bul jumys kelesi jyly tolyǵymen aıaqtalady.

Bul rette Taldyqorǵan qalasynyń ekologıasyn jaqsartý úshin jergilikti búdjetten gazben júretin 55 jańa avtobýs satyp alynyp, qala marshrýttaryna shyǵarylǵanyn aıta ketken jón. Oǵan 2,3 mlrd teńge bólindi.