Ulttyq kiimder kúnine arnalǵan Naýryznamanyń besinshi kúninde oblys aýmaǵynda etnodefile, kórmeler, otbasylyq konkýrstar, mekeme-uiym ujymdarynyń beinerolikter chellendji uiymdastyryldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Máselen, Taldyqorǵan qalasynyń ortalyq alańynda etnodefile ótkizilip, onda qyz-jigitter túrli etnostardyń ulttyq kiimderin kiip shyqty. Mereke budan ári «Naýryz Arýy – 2025» baiqaýynyń finalymen jalǵasty. Osyǵan deiin baiqaýdyń irikteý týry Ótenai aýyldyq mádeniet úiinde ótken bolatyn. Irikteýden ótken on arý kórkine aqyly sai ekenin tanytý úshin kórermender aldynda óziniń bar ónerin pash etip, sahnada qazaqtyń ádet-ǵurpy men salt-dástúrine bailanysty suraqtarǵa jaýap berdi. Baiqaý qorytyndysynda bas júldege Taldyqorǵandaǵy B.Syrttanov atyndaǵy №25 orta mekteptiń 11 synyp oqýshysy Erkejan Serikhan ie boldy.
– Búgin nemerem Erkejannyń ónerin tamashalap, jankúier bolýǵa Alakól aýdany, Kólbai aýylynan arnaiy keldim. Nemeremniń jeńiske jetkenine qýanyshtymyn. Qyzdardyń bári de laiyqty óner kórsetti. Baiqaý maǵan qatty unady. Bul tek qana sulýlyq baiqaýy emes, sonymen qatar ulttyq muramyzǵa, ulttyq tárbiege úlken mán berip, jastardyń rýhani damýyna yqpal etetin shara boldy. Barsha jurtshylyqty Naýryz merekesimen quttyqtaimyn, – dedi Jańylqan Súleimenova.
Sol siiaqty Qaratal aýdanynyń Úshtóbe qalasynda «Ulttyq kiimdegi otbasy» baiqaýy uiymdastyryldy. Baiqaýǵa 44 otbasy qatysty. Olar qazaq halqynyń kúndelikti kiimderimen qatar, túrli qýanyshtarda kietin merekelik kiimderin, qazaqy oiýlar men áshekeiledi de dáriptedi. Baiqaýda Jumadil, Erǵosaevtar, Zahan, Surabaldinovtar, Dolashovtar, Rysqazy, Ashyqbaevtar jáne Apashanovtar otbasylary jeńimpaz atanyp, diplom men baǵaly syilyqtarǵa ie boldy.
– Otbasymyzben qazaqi kiim kiip, merekege arnaiy daiyndalyp keldik. Maqsatymyz - qazaqtyń salt-dástúrin jańǵyrtý. Naýryz aiasynda ulttyq kiimderge erekshe kóńil bóline bastaǵany qýantady. Osy arqyly biz ulttyń muramyzdy ulyqtap qana qoimai, jastarǵa úlgi kórsetemiz. Óitkeni ulttyq kiim – halyqtyń ainasy, – Qaratal aýdanynyń turǵyny Naǵashybai Biláluly.
Osy kúni ulttyq kiimderdi dáripteýge arnalǵan is-sharalar oblystyń barlyq aýdan-qalalarynda keńinen uiymdastyryldy.
