Ulttyq kıimder kúnine arnalǵan Naýryznamanyń besinshi kúninde oblys aýmaǵynda etnodefıle, kórmeler, otbasylyq konkýrstar, mekeme-uıym ujymdarynyń beınerolıkter chellendji uıymdastyryldy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.  

Máselen, Taldyqorǵan qalasynyń ortalyq alańynda etnodefıle ótkizilip, onda qyz-jigitter túrli etnostardyń ulttyq kıimderin kıip shyqty. Mereke budan ári «Naýryz Arýy – 2025» baıqaýynyń fınalymen jalǵasty. Osyǵan deıin baıqaýdyń irikteý týry Ótenaı aýyldyq mádenıet úıinde ótken bolatyn. İrikteýden ótken on arý kórkine aqyly saı ekenin tanytý úshin kórermender aldynda óziniń bar ónerin pash etip, sahnada qazaqtyń ádet-ǵurpy men salt-dástúrine baılanysty suraqtarǵa jaýap berdi. Baıqaý qorytyndysynda bas júldege Taldyqorǵandaǵy B.Syrttanov atyndaǵy №25 orta mekteptiń 11 synyp oqýshysy Erkejan Serikhan ıe boldy.

– Búgin nemerem Erkejannyń ónerin tamashalap, jankúıer bolýǵa Alakól aýdany, Kólbaı aýylynan arnaıy keldim. Nemeremniń jeńiske jetkenine qýanyshtymyn. Qyzdardyń bári de laıyqty óner kórsetti. Baıqaý maǵan qatty unady. Bul tek qana sulýlyq baıqaýy emes, sonymen qatar ulttyq muramyzǵa, ulttyq tárbıege úlken mán berip, jastardyń rýhanı damýyna yqpal etetin shara boldy. Barsha jurtshylyqty Naýryz merekesimen quttyqtaımyn, – dedi Jańylqan Súleımenova.

Atap ótsek, osy kúni Taldyqorǵandaǵy Saltanat saraıynda «Ulttyq kıim – ult beınesi» kórmesi, sondaı-aq Kórkemsýret galereıasynda «Qyzaı órnek» taqyrybynda kórme-festıval ótkizildi. Kórme-festıvalda «Qyzaı qalpaq», «Qyzaı kımeshek», «Qyzaı taqıa», «Qyzaı túskıiz ben shymyldyq», «Qyzaı er men at ábzelderi», «Qyz jasaýy», basqa da turmystyq buıymdardyń, Qyzaı anaǵa qatysty baspadan shyqqan shejire, tarıhı, ǵylymı eńbekterdiń tanystyrylymy boldy.

Sol sıaqty Qaratal aýdanynyń Úshtóbe qalasynda «Ulttyq kıimdegi otbasy» baıqaýy uıymdastyryldy. Baıqaýǵa 44 otbasy qatysty. Olar qazaq halqynyń kúndelikti kıimderimen qatar, túrli qýanyshtarda kıetin merekelik kıimderin, qazaqy oıýlar men áshekeıledi de dáriptedi. Baıqaýda Jumadil, Erǵosaevtar, Zahan, Surabaldınovtar, Dolashovtar, Rysqazy, Ashyqbaevtar jáne Apashanovtar otbasylary jeńimpaz atanyp, dıplom men baǵaly syılyqtarǵa ıe boldy.

– Otbasymyzben qazaqı kıim kıip, merekege arnaıy daıyndalyp keldik. Maqsatymyz - qazaqtyń salt-dástúrin jańǵyrtý. Naýryz aıasynda ulttyq kıimderge erekshe kóńil bóline bastaǵany qýantady. Osy arqyly biz ulttyń muramyzdy ulyqtap qana qoımaı, jastarǵa úlgi kórsetemiz. Óıtkeni ulttyq kıim – halyqtyń aınasy, – Qaratal aýdanynyń turǵyny Naǵashybaı Biláluly.

Sol sıaqty Kóksý aýdanynda isker áıelderdiń qoǵamdaǵy rólin, olardyń kásipkerlik jáne eńbek salasyndaǵy jetistikterin atap ótý maqsatynda «Jumysshy mamandyqtary jylyna» arnalǵan «Áıel jáne eńbek mereıi» atty iskerlik áıelder forýmy ótti. İs-shara «Adal Azamat - Adal eńbek - Adal tabys» atty kórmemen bastalyp, onda isker áıelder óz qolymen tikken ulttyq kıimderi men óz qolymen daıyndaǵan ulttyq taǵamdaryn, aǵashtan, bylǵarydan jasalǵan qolóner buıymdaryn, ulttyq kıimder beınelengen kartınalardy kórermender nazaryna usyndy.

Osy kúni ulttyq kıimderdi dáripteýge arnalǵan is-sharalar oblystyń barlyq aýdan-qalalarynda keńinen uıymdastyryldy.