ۇلتتىق كيىمدەر كۇنىنە ارنالعان ناۋرىزنامانىڭ بەسىنشى كۇنىندە وبلىس اۋماعىندا ەتنودەفيلە، كورمەلەر، وتباسىلىق كونكۋرستار، مەكەمە-ۇيىم ۇجىمدارىنىڭ بەينەروليكتەر چەللەندجى ۇيىمداستىرىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ماسەلەن، تالدىقورعان قالاسىنىڭ ورتالىق الاڭىندا ەتنودەفيلە وتكىزىلىپ، وندا قىز-جىگىتتەر ءتۇرلى ەتنوستاردىڭ ۇلتتىق كيىمدەرىن كيىپ شىقتى. مەرەكە بۇدان ءارى «ناۋرىز ارۋى – 2025» بايقاۋىنىڭ فينالىمەن جالعاستى. وسىعان دەيىن بايقاۋدىڭ ىرىكتەۋ تۋرى وتەناي اۋىلدىق مادەنيەت ۇيىندە وتكەن بولاتىن. ىرىكتەۋدەن وتكەن ون ارۋ كوركىنە اقىلى ساي ەكەنىن تانىتۋ ءۇشىن كورەرمەندەر الدىندا ءوزىنىڭ بار ونەرىن پاش ەتىپ، ساحنادا قازاقتىڭ ادەت-عۇرپى مەن سالت-داستۇرىنە بايلانىستى سۇراقتارعا جاۋاپ بەردى. بايقاۋ قورىتىندىسىندا باس جۇلدەگە تالدىقورعانداعى ب.سىرتتانوۆ اتىنداعى №25 ورتا مەكتەپتىڭ 11 سىنىپ وقۋشىسى ەركەجان سەرىكحان يە بولدى.
– بۇگىن نەمەرەم ەركەجاننىڭ ونەرىن تاماشالاپ، جانكۇيەر بولۋعا الاكول اۋدانى، كولباي اۋىلىنان ارنايى كەلدىم. نەمەرەمنىڭ جەڭىسكە جەتكەنىنە قۋانىشتىمىن. قىزداردىڭ ءبارى دە لايىقتى ونەر كورسەتتى. بايقاۋ ماعان قاتتى ۇنادى. بۇل تەك قانا سۇلۋلىق بايقاۋى ەمەس، سونىمەن قاتار ۇلتتىق مۇرامىزعا، ۇلتتىق تاربيەگە ۇلكەن ءمان بەرىپ، جاستاردىڭ رۋحاني دامۋىنا ىقپال ەتەتىن شارا بولدى. بارشا جۇرتشىلىقتى ناۋرىز مەرەكەسىمەن قۇتتىقتايمىن، – دەدى جاڭىلقان سۇلەيمەنوۆا.
اتاپ وتسەك، وسى كۇنى تالدىقورعانداعى سالتانات سارايىندا «ۇلتتىق كيىم – ۇلت بەينەسى» كورمەسى، سونداي-اق كوركەمسۋرەت گالەرەياسىندا «قىزاي ورنەك» تاقىرىبىندا كورمە-فەستيۆال وتكىزىلدى. كورمە-فەستيۆالدا «قىزاي قالپاق»، «قىزاي كيمەشەك»، «قىزاي تاقيا»، «قىزاي تۇسكيىز بەن شىمىلدىق»، «قىزاي ەر مەن ات ابزەلدەرى»، «قىز جاساۋى»، باسقا دا تۇرمىستىق بۇيىمداردىڭ، قىزاي اناعا قاتىستى باسپادان شىققان شەجىرە، تاريحي، عىلىمي ەڭبەكتەردىڭ تانىستىرىلىمى بولدى.
سول سياقتى قاراتال اۋدانىنىڭ ۇشتوبە قالاسىندا «ۇلتتىق كيىمدەگى وتباسى» بايقاۋى ۇيىمداستىرىلدى. بايقاۋعا 44 وتباسى قاتىستى. ولار قازاق حالقىنىڭ كۇندەلىكتى كيىمدەرىمەن قاتار، ءتۇرلى قۋانىشتاردا كيەتىن مەرەكەلىك كيىمدەرىن، قازاقى ويۋلار مەن اشەكەيلەدى دە دارىپتەدى. بايقاۋدا ءجۇمادىل، ەرعوسايەۆتار، زاحان، سۇرابالدينوۆتار، دولاشوۆتار، رىسقازى، اشىقبايەۆتار جانە اپاسحانوۆتار وتباسىلارى جەڭىمپاز اتانىپ، ديپلوم مەن باعالى سىيلىقتارعا يە بولدى.
– وتباسىمىزبەن قازاقي كيىم كيىپ، مەرەكەگە ارنايى دايىندالىپ كەلدىك. ماقساتىمىز - قازاقتىڭ ءسالت-داستۇرىن جاڭعىرتۋ. ناۋرىز اياسىندا ۇلتتىق كيىمدەرگە ەرەكشە كوڭىل بولىنە باستاعانى قۋانتادى. وسى ارقىلى ءبىز ۇلتتىڭ مۇرامىزدى ۇلىقتاپ قانا قويماي، جاستارعا ۇلگى كورسەتەمىز. ويتكەنى ۇلتتىق كيىم – حالىقتىڭ ايناسى، – قاراتال اۋدانىنىڭ تۇرعىنى ناعاشىباي ءبىلال ۇلى.
سول سياقتى كوكسۋ اۋدانىندا ىسكەر ايەلدەردىڭ قوعامداعى ءرولىن، ولاردىڭ كاسىپكەرلىك جانە ەڭبەك سالاسىنداعى جەتىستىكتەرىن اتاپ ءوتۋ ماقساتىندا «جۇمىسشى ماماندىقتارى جىلىنا» ارنالعان «ايەل جانە ەڭبەك مەرەيى» اتتى ىسكەرلىك ايەلدەر فورۋمى ءوتتى. ءىس-شارا «ادال ازامات - ادال ەڭبەك - ادال تابىس» اتتى كورمەمەن باستالىپ، وندا ىسكەر ايەلدەر ءوز قولىمەن تىككەن ۇلتتىق كيىمدەرى مەن ءوز قولىمەن دايىنداعان ۇلتتىق تاعامدارىن، اعاشتان، بىلعارىدان جاسالعان قولونەر بۇيىمدارىن، ۇلتتىق كيىمدەر بەينەلەنگەن كارتينالاردى كورەرمەندەر نازارىنا ۇسىندى.
وسى كۇنى ۇلتتىق كيىمدەردى دارىپتەۋگە ارنالعان ءىس-شارالار وبلىستىڭ بارلىق اۋدان-قالالارىندا كەڭىنەن ۇيىمداستىرىلدى.
