جەتىسۋدا الماتى وبلىسىنىڭ شەكاراسىنان تالدىقورعان اۋەجايىنا دەيىنگى جول جاڭارادى. وسى ماقساتتا قۇرىلىس جۇمىستارى ءتورت ۋچاسكەگە بولىنگەن. سولاردىڭ ءبىرى «الماتى - وسكەمەن» اۆتوجولىنىڭ العاباس اۋىلىنان مۇقىرى ەڭىس جولىنا دەيىنگى 21 شاقىرىمىنداعى كۇردەلى جوندەۋ جۇمىستارىمەن وبلىس اكىمى بەيبىت يسابايەۆ تانىسىپ قايتتى، دەپ حابارلايدى Dalanews.kz
اتالعان ۋچاسكەلەردىڭ ىشىندە «الماتى - وسكەمەن» اۆتوجولىنىڭ الماتى وبلىسىنىڭ شەكاراسىنان العاباس اۋىلىنا دەيىنگى 124-213 كم مەن مۇقىرى ەڭىس جولىنان تالدىقورعان اينالما جولىنا دەيىنگى 234-254 شاقىرىمىندا ورتاشا جوندەۋ بيىل باستالادى، اتالعان اينالما جولدان اۋەجايعا دەيىنگى 254 – 287 كم بولىگىندە ورتاشا جوندەۋ ءجۇرىپ جاتىر، ال العاباس اۋىلىنان مۇقىرى ەڭىس جولىنا دەيىنگى 213-234 كم ۋچاسكەسىندە كۇردەلى جوندەۋدەن وتكىزىلۋدە. اتاپ وتسەك، بۇل جوبالار 2027 جىلى تولىق اياقتالادى دەپ جوسپارلانعان.
«قازاۆتوجول» ۇق» اق جەتىسۋ وبلىسى فيليالىنىڭ باستىعى نۇرحات اقىلتايەۆتىڭ ايتۋىنشا، «الماتى - وسكەمەن» اۆتوجولىنىڭ 213-234 شاقىرىمىن كۇردەلى جوندەۋ جوباسى شەڭبەرىندە جول توسەمى تولىق اۋىستىرىلىپ، تاۋ بەتكەيلەرىن جايپاقتاۋ جانە ءمونوليتتى تاۋ ارىقتارىن بەتونداۋ جۇرگىزىلەدى. سونداي-اق مال وتۋىنەن قورعايتىن تورلى قورشاۋلار ورناتىلىپ، مال وتەتىن وتكەل سالۋ قاراستىرىلعان، سۋ وتكىزۋ قۇبىرلارىن جوندەۋ مەن سالۋ، سول سياقتى مۇقىرى وزەنى ارقىلى وتەتىن كوپىردى جوندەۋ جۇمىستارى اتقارىلادى. بۇگىنگى كۇنگە 7 شاقىرىم ۋچاسكەدە جول نەگىزىن قايتا قۇرۋ جۇمىستارى، جوتا بەتكەيلەرىن جايپاقتاۋ، سۋ اعار كيۋۆەتتەردى بەتونداۋ اتقارىلۋدا. وسى رەتتە 2 شاقىرىمنان استام جولدا اسفالتبەتون جابىنىنىڭ 2 قاباتى جاڭادان توسەلدى، جۇمىستار ەكى اۋىسىمدا ءجۇرىپ جاتىر. قۇرىلىسقا 230 بىرلىك تەحنيكا مەن 300-گە جۋىق ادام جۇمىلدىرىلعان. جول توسەمىن استىڭعى قاباتىمەن 4 جولاقتى اشۋ قىركۇيەك-قازان ايلارىنا جوسپارلانىپ وتىر.
- جۇرگىزىلىپ جاتقان كۇردەلى جوندەۋ جۇمىستارىنا بايلانىستى جول بويىنداعى جول-كولىك وقيعالارىنىڭ الدىن الۋ جانە قوزعالىس قاۋىپسىزدىگىن ارتتىرۋ ماقساتىندا كولىك قوزعالىسىنا ۋاقىتشا وزگەرىستەر ەنگىزىلەتىن بولادى. اتاپ ايتقاندا، بەكىتىلگەن جول قوزعالىسىن ۇيىمداستىرۋ سىزباسىنا سايكەس، الماتى–تالدىقورعان باعىتى بەلگىلەنگەن قالىپتى رەجيمدە ساقتالادى، ال ەرتەڭ، ياعني 28 ساۋىردەن باستاپ تالدىقورعاننان الماتىعا باعىتتالعان كولىك قوزعالىسى مۇقىرى ەلدى مەكەنى ارقىلى وتەتىن ۇزىندىعى 27 شاقىرىمدىق اينالما جولمەن ۇيىمداستىرىلادى، - دەدى ن. اقىلتايەۆ.
وسى ورايدا وبلىس اكىمى جول قۇرىلىسىنىڭ ساپاسىنا ەرەكشە ءمان بەرۋدى جانە جوبانى مەرزىمىندە اياقتاۋدى تاپسىردى. سونداي-اق وسىمەن جەتىسۋ وبلىسىنداعى نەگىزگى جولداردىڭ ماسەلەسى تولىق شەشىلەتىنىن دە اتاپ ءوتتى.
- ءبىز قورعاستان سارىوزەككە دەيىنگى جولدىڭ جوندەۋ جۇمىستارىن بىتىردىك. مولالىنىڭ بۇرىلىسىنان بالقاشقا دەيىنگى، ۇشتوبەدەن – كوپبىرلىككە دەيىنگى جولدى اياقتادىق، ەندى ۇشتوبە – تالدىقورعان اراسىنداعى جولدى بيىل كۇزدە بىتىرەمىز. ءسويتىپ، كەلەسى جىلى وبلىستاعى نەگىزگى جولداردىڭ ماسەلەسى تولىق شەشىلەدى، مۇنان سوڭ اۋىلارالىق جولداردى جوندەۋ جۇمىستارى جالعاسادى، - دەدى ب. يسابايەۆ.
