Túrkistan oblysy Eski Iqan aýylynda buralqy it bes jasar qyzǵa shabýyl jasaǵan. Bala aýyr jaraqatpen aýrýhanaǵa jetkizildi, dep habarlaidy dalanews.kz otyrar.kz-ke siltep.
Qyzdyń anasynyń aitýynsha, kúndiz qyzyn týystaryna jibergen. Bala basqa balalarmen oinap júrgen kezde kenet it bas salǵan.
“Men barǵansha qyzymdy jansaqtaý bólimine alyp ketipti. Ana úshin mundaidy kórý óte aýyr. Qyzymnyń betinde saý jeri qalmaǵan. Kóziniń asty jyrtylyp, súiegi kórinip tur", - deidi aýyl turǵyny Dilafrýz Halikova.
Oqiǵadan keiin otbasy ittiń iesin izdegen. Alaida janýar qaidan kelgeni jáne kimge tiesili ekeni áli anyqtalmaǵan. Dárigerler it balanyń oń jaq betin qatty talaǵanyn rastaǵan. Ota jasalǵanymen, tyrtyqtar qalatynyn da aitqan.
Túrkistan qalalyq balalar aýrýhanasynyń bólim meńgerýshisi Gúljazira Berdiázimovanyń sózinshe, qyz travmatikalyq shok alǵan. Sonymen qatar, onyń basynan jaraqat pen qulaǵan kezdegi soqqylar anyqtalǵan. Qazir jaǵdaiy turaqty, em qabyldap jatyr.
Aýyl turǵyndarynyń aitýynsha, bul óńirdegi alǵashqy jaǵdai emes. Keiingi ýaqytta birneshe adam itten zardap shekken.
Saýran aýdandyq ákimdigi jaǵdai baqylaýda ekenin málimdedi. Bilik ókilderiniń sózinshe, qańǵybas janýarlardy aýlaý jáne joiý jumystary turaqty júrgiziledi.
Basylym málimetinshe, aýdanda itterdi aýlaý, ustaý jáne joiý jumystaryna 6,5 mln teńge bólingen. Jyl basynan beri munda shamamen 50 it aýlanǵan. Onyń 20-dan astamy qańǵybas nemese iesiz janýarlar bolǵan.
