Qostanai oblysyndaǵy Tobyl qalasynyń musylman ziratynda qabir basyndaǵy gúlder, kóshetter, tipti granit oryndyqtardyń joǵalyp jatqany turǵyndardyń narazylyǵyn týdyrdy. Zardap shekkenderdiń arasynda Aqtaý mańyndaǵy áýe apatynda qaza tapqan Sálima Jutaevanyń otbasy da bar, dep habarlaidy dalanews.kz.
Marqumnyń anasy Ultýǵan Jutaeva qyzynyń qabirine kún saiyn derlik baryp turatynyn aitady. 29 jastaǵy Sálima Jutaeva Aqtaý mańyndaǵy ushaq apatynda kóz jumǵan. Alaida aýyr qaiǵyny bastan ótkergen otbasy endi zirattaǵy urlyqqa tap bolyp otyr.
Týystarynyń sózinshe, aldymen qabir basyndaǵy tiri gúlder julynyp ketken. Keiin mármár men granitten jasalǵan oryndyqtyń bólshekteri urlanǵan. Artynsha qymbat kóshetter de qazyp áketilgen.
"Biyl kóshetterdi urlap ketti, byltyr mármár men granitten jasalǵan oryndyqty alyp ketken. Adamdardyń buǵan qalai qoly barady? Biz áli de osy qaiǵydan aiyǵa almai júrmiz. Jalǵyz qyzym edi. Nebári 29 jasta bolatyn, ómiri endi ǵana bastalǵan edi", – deidi Ultýǵan Jutaeva.
Kezekti urlyqtan keiin otbasy qabir basyna qulyp salynatyn qaqpa ornatqan. Biraq bul da urylardy toqtatpaǵan. Olar qorshaýdyń syrtynda ósip turǵan kóshetterdi alyp ketken.
"Bir kúni kelsek, joq. Bir jyl boiy kútip-baptadyq, qysta jaýyp, jazda sýaryp júrdik. Qabir basynan mundai nárseni urlaý úshin qandai adam bolý kerek?" – dedi marqumnyń týysy Rýslan Jutaev.
Jergilikti turǵyndar mundai jaǵdaidyń jiilep ketkenin aitady. Olardyń sózinshe, basqa qabirlerden de shyrsha, qumyra, gúl jáne túrli zattar joǵalyp jatyr. Tobyl turǵyny Aigúl Sháripova ziratta kúzet te, kamera da, qorshaý da joq ekenin aityp, qaýipsizdik máselesin kóterdi.
Politsiia qabir basynan shyrshanyń urlanýyna qatysty sotqa deiingi tergeý bastalǵanyn málimdedi. Qostanai oblysy politsiia departamentiniń habarlaýynsha, quqyq buzýshylyqqa qatysy bar adamdy anyqtaý jáne ustaý úshin jedel-izdestirý sharalary júrgizilip jatyr.
Aqtaý mańyndaǵy áýe apatynda qaza tapqan Sálima Jutaevanyń anasy da politsiiaǵa aryz túsirgen. Ol kináliler jazalanyp, zirat aýmaǵyna qorshaý men kúzet qoiylady dep úmittenedi.
