"Almaty Sý" qala turǵyndaryn sý jáne káriz qyzmeti úshin tólemdi keshiktirmeýge shaqyrdy, dep habarlaidy dalanews.kz.
Almatyda turǵyndardyń sýmen jabdyqtaý jáne káriz qyzmetteri úshin jalpy bereshegi 550 mln teńgeden asqan. Qaryzdy ýaqytynda ótemeý ósimpul jinalýyna, tipti sý berý toqtatylýyna ákep soǵýy múmkin.
Kásiporyn usynǵan málimetke sáikes jalpy bereshektiń 250 million teńgege jýyǵy kópqabatty úilerdiń turǵyndaryna tiesili. Al jeke sektordaǵy turǵyndardyń qaryzy 300 million teńgeden asqan.
"Almaty Sý" qyzmetkerleri turaqty túrde reidter júrgizip, bereshegi bar turǵyndardyń úilerine barady. Olarǵa qaryzdy óteý qajet ekeni týraly habarlamalar tabystap, tólemdi keshiktirýdiń qandai saldary bolýy múmkin ekenin túsindiredi.
"Almaty Sý" ShJQ MKK ókilderiniń sózinshe, sý jáne káriz qyzmetteri úshin tólem shottary ai saiyn kelesi aidyń 15-ine deiin usynylady. Tólemdi sol aidyń 25-ine deiin tóleý qajet. Osy merzimde tólem jasalmasa, 26-synan bastap bereshek merzimi ótken qaryz bolyp eseptelip, oǵan ósimpul esepteledi. Sonyń saldarynan qaryz somasy birtindep ulǵaia beredi.
Turǵyn bereshegin ótemese, kásiporyn sý berýdi shekteýge nemese tolyq toqtatýǵa quqyly. Mundai shara qoldanylǵanǵa deiin kúntizbelik úsh kún buryn tutynýshyǵa tiisti eskertý beriledi. Bul sharalar zańnamada belgilengen tártippen júzege asyrylady. Bereshek uzaq ýaqyt boiy ótelmese, "Almaty Sý" qaryzdy óndirip alý úshin notariýsqa nemese sotqa júgine alady.
