Jetisýda Tuńǵysh Prezident kúni jańa balabaqsha paidalanýǵa berildi
Úsharal qalasy turǵyndaryn qýanyshty jańalyqpen Alakól aýdanynyń ákimi Almas Abdinov quttyqtap, mektep jasyna deiingi balalardy balabaqshamen qamtý isindegi kásipkerlerdiń úlesin atap ótti.
– Tuńǵysh Prezident kúni men Táýelsizdiktiń 30 jyldyǵy qarsańynda aýdanymyzda taǵy bir jekemenshik balabaqsha ashylyp otyr. Bul – bárimiz úshin qýanysh. Mektepke deiingi bilim men tárbie – jas urpaq úshin asa mańyzdy. Sondyqtan oǵan erekshe kóńil bólemiz. Jańa balabaqshada balalarymyz laiyqty bilim alady dep oilaimyn. Bul - jerlesimiz Nurjan Qalbaev ashyp otyrǵan ekinshi balabaqsha. Yntymaqtastyqta jumys istegeni úshin metsenatqa kópshiliktiń atynan alǵys aitamyn. Turǵyndardy aldaǵy merekelerimen quttyqtaimyn, – dedi A.Abdinov.
Atap ótsek, bul – aýdanda ashylyp otyrǵan jekemenshik segizinshi balabaqsha. Alakól aýdanynda balabaqshamen qamtý deńgeii - 99,6%. Munda 19 balabaqsha, 32 mektepke deiingi shaǵyn ortalyq jumys isteidi.
Alakól aýdandyq ákimdiginiń habarlaýynsha, eki qabatty «Kórkem-2» jańa balabaqsha ǵimaratynda balalardyń bilimi men tárbiesine barlyq jaǵdai jasalǵan. Balǵyndarmen logoped, psiholog jáne basqa da mamandar jumys isteidi. Ǵimarat aýmaǵynda balalar oiyn alańy qarastyrylǵan, munda olardyń dene shynyqtyrýyna múmkindik bar.
Jańa balabaqsha ashylýynyń arqasynda 50 adam jumyspen qamtyldy. Áleýmettik nysan 2-den 6 jasqa deiingi balalardy qabyldaidy, qyzmet kórsetý quny qoljetimdi. Kóp balaly otbasylardyń balalary balabaqshaǵa tegin qabyldanady.
Jalpy Almaty oblysynda mektepke deiingi balalardy balabaqshamen qamtý 99% jetken. Al kelesi jyly bul kórsetkish 100% bolady dep josparlanyp otyr.
