ءۇشارال قالاسى تۇرعىندارىن قۋانىشتى جاڭالىقپەن الاكول اۋدانىنىڭ اكىمى الماس ابدينوۆ قۇتتىقتاپ، مەكتەپ جاسىنا دەيىنگى بالالاردى بالاباقشامەن قامتۋ ىسىندەگى كاسىپكەرلەردىڭ ۇلەسىن اتاپ ءوتتى.
– تۇڭعىش پرەزيدەنت كۇنى مەن تاۋەلسىزدىكتىڭ 30 جىلدىعى قارساڭىندا اۋدانىمىزدا تاعى ءبىر جەكەمەنشىك بالاباقشا اشىلىپ وتىر. بۇل – ءبارىمىز ءۇشىن قۋانىش. مەكتەپكە دەيىنگى ءبىلىم مەن تاربيە – جاس ۇرپاق ءۇشىن اسا ماڭىزدى. سوندىقتان وعان ەرەكشە كوڭىل بولەمىز. جاڭا بالاباقشادا بالالارىمىز لايىقتى ءبىلىم الادى دەپ ويلايمىن. بۇل - جەرلەسىمىز نۇرجان قالبايەۆ اشىپ وتىرعان ەكىنشى بالاباقشا. ىنتىماقتاستىقتا جۇمىس ىستەگەنى ءۇشىن مەسەناتقا كوپشىلىكتىڭ اتىنان العىس ايتامىن. تۇرعىنداردى الداعى مەرەكەلەرىمەن قۇتتىقتايمىن، – دەدى ا.ابدينوۆ.
اتاپ وتسەك، بۇل – اۋداندا اشىلىپ وتىرعان جەكەمەنشىك سەگىزىنشى بالاباقشا. الاكول اۋدانىندا بالاباقشامەن قامتۋ دەڭگەيى - 99،6%. مۇندا 19 بالاباقشا، 32 مەكتەپكە دەيىنگى شاعىن ورتالىق جۇمىس ىستەيدى.
الاكول اۋداندىق اكىمدىگىنىڭ حابارلاۋىنشا، ەكى قاباتتى «كوركەم-2» جاڭا بالاباقشا عيماراتىندا بالالاردىڭ ءبىلىمى مەن تاربيەسىنە بارلىق جاعداي جاسالعان. بالعىندارمەن لوگوپەد، پسيحولوگ جانە باسقا دا ماماندار جۇمىس ىستەيدى. عيمارات اۋماعىندا بالالار ويىن الاڭى قاراستىرىلعان، مۇندا ولاردىڭ دەنە شىنىقتىرۋىنا مۇمكىندىك بار.
جاڭا بالاباقشا اشىلۋىنىڭ ارقاسىندا 50 ادام جۇمىسپەن قامتىلدى. الەۋمەتتىك نىسان 2-دەن 6 جاسقا دەيىنگى بالالاردى قابىلدايدى، قىزمەت كورسەتۋ قۇنى قولجەتىمدى. كوپ بالالى وتباسىلاردىڭ بالالارى بالاباقشاعا تەگىن قابىلدانادى.
جالپى الماتى وبلىسىندا مەكتەپكە دەيىنگى بالالاردى بالاباقشامەن قامتۋ 99% جەتكەن. ال كەلەسى جىلى بۇل كورسەتكىش 100% بولادى دەپ جوسپارلانىپ وتىر.
