Jetisý oblysynda Uly Otan soǵysyndaǵy Jeńistiń 80 jyldyǵyn merekeleý aiasynda 9 mamyrǵa deiin sozylatyn densaýlyq ailyǵy bastaldy. Tegin meditsinalyq tekserýler men konsýltatsiialyq-diagnostikalyq kómek emhanalarda da, úide de uiymdastyrylýda. Dárigerlerdiń mobildi brigadalary atalǵan sharada 1500 astam tyl ardagerin qamtýdy josparlap otyr, dep habarlaidy Dalanews.kz
Máselen, jýyrda quramynda hirýrg, terapevt jáne nevropatolog mamandary bar meditsinalyq brigada Eskeldi aýdany Jetisý aýylynda turatyn tyl eńbekkeri Balsheker Taijanovaǵa bardy.
Jasy ulǵaiǵandyqtan ardagerge aýrýhanaǵa barý qiynǵa soǵady. Sondyqtan meditsina qyzmetkerleri turaqty túrde úide kómek kórsetedi.
«Biz ardagerge jylyna birneshe ret kelip turamyz. Ol úlgili patsient, bizdiń aitqan aqyl-keńesterimizdi árdaiym ýaqtyly oryndaidy», - deidi Eskeldi aýdanynyń ortalyq aýdandyq aýrýhanasynyń meńgerýshisi Saiat Tikenbaev.
Aita ketsek, Balsheker Taijanova – naǵyz qarapaiym eńbek adamy. Olar týraly el Prezidenti: «Adal ári tabandy eńbegimen tabysqa jetken adamdar qashanda qurmetti, syily bolýy kerek» degen bolatyn.
Jas kezinde Balsheker apa qyzylsha alqabynda jumys istedi. Keiin saýynshy bolyp, kúnine 44 siyr saýdy, mal baqty. Laiyqty demalysqa shyqqannan keiin ol týǵan aýdanynyń damýyna, jastardy tárbieleýge úles qosýyn jalǵastyrdy. Kóp balaly ana jubaiymen birge jeti bala tárbielep ósirdi. Qazir 22 nemeresi, 44 shóberesi bar.
- Meniń basty qaǵidatym – adal eńbek etý, sol arqyly laiyqty ómir súrý. Tek sonda ǵana biz adamgershilikti saqtap, izgi qasietterdi bolashaq urpaqqa jetkize alamyz. Memleketimizdiń bizge, qarttarǵa qamqor bolǵany óte jaqsy. Jyly sózge, jaidary kóńilge ne jetsin, - dedi ol.
Jalpy Jetisý oblysynda Jeńistiń 80 jyldyǵyn merekeleý aiasynda soǵys ardagerlerine, múgedekterine, olarǵa teńestirilgender men tyl eńbekkerlerine keshendi áleýmettik qoldaý kórsetý kózdelgen.
- Biylǵy jyly óńirde Jeńistiń 80 jyldyǵyn merekeleý qurmetine Uly Otan soǵysynyń qatysýshylary men múgedekterine, sondai-aq olarǵa teńestirilgen 3 215 adamǵa birjolǵy materialdyq kómek kórsetýge 393,8 mln.teńge bólindi. Bul rette maidangerlerge 5 mln. teńgeden tólenetin bolady. Janqiiarlyq eńbegi úshin berilgen nagradalary bar tyl qyzmetkerlerine 100 myń teńgeden tólenedi. Materialdyq qoldaýdan basqa UOS qatysýshylary men múgedekteri úshin kommýnaldyq shyǵyndarǵa ai saiynǵy ótemaqy túrinde jeńildikter beriledi, ardagerler tehnikalyq ońaltý quraldarymen qamtamasyz etiledi, sondai-aq jylyna bir ret tegin sanatorlyq-kýrorttyq joldamalar alady. Atap aitqanda, biyl óńirde 243 ardagerge sanatorlyq-kýrorttyq emdelýge 50 mln. teńge bólindi, - dedi oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Ermek Mizambaev.
Jalpy Jetisý oblysynda Uly Otan soǵysyna tikelei qatysýshy 2 ardager bar. Olar Tóleýbai Chektybaev pen Ysqaq Qusaiynov, ardagerler búginde 100 jastan asty. Sol siiaqty 1598 tyl eńbekkerleri turady.
