Jańa bólme tabıǵat kórinisterinen turady. Onyń ishinde sý burqaǵy ornatylǵan, balalarǵa arnalǵan átkenshek pen oryndyqtar qoıylǵan. Erekshe qajettiligi bar em alatyn balalar qustardyń daýysyn, sýdyń syldyryn estip, tabıǵat aıasynda júrgendeı áser alady.
Jańa bólme «Mańǵystaýmunaıgaz» AQ, «Jetibaımunaıgaz» óndiristik mekemesiniń munaıshylarynyń demeýshiligimen ashylǵanyn aıta ketýimiz kerek.
Balalardyń bolashaǵy úshin munaıshylar «Bir jaǵadan bas, bir jeńnen qol shyǵaryp» bir kúndik jalaqylaryn aýdaryp, jańa bólmeni kerek-jaraqtarmen jabdyqtaýǵa atsalysqan. Arnaıy kabınettegi dúnıelerdi munaıshylardyń ózderi jasaǵan.
Jetibaı aýylynyń múmkindigi shekteýli balalarǵa arnalǵan psıhologıalyq-pedagogıkalyq túzetý ortalyǵynda búgingi tańda em alyp jatqan 70 bala bar. Ár balaǵa psıholog, sýrdopedagog, defektolog mamandary qarastyrylǵan jáne emdik-deneshynyqtyrý bólmesimen qamtylǵan.
Em-sharalar eki aýysymda júrgiziledi. Tirek-qımyly álsiz balalarǵa emdik massaj jasalyp, arnaıy qural-jabdyqtarmen búldirshinderdiń bulshyq etterin oıatý sharasy jasalady.
